ەكولوگيانى قولداۋشى #تازاتاۋ باستاماشىل توبىنىڭ بەلسەندىلەرى تابيعات اياسىندا ءوزىن-وزى دۇرىس ۇستاۋدى ناسيحاتتايتىن پلاكاتتار كورمەسىنە قاتىساتىن جۇمىستاردى تاڭداپ الدى. كورمە 26 ساۋىردە الماتىدا اشىلىپ، 4ء-ىنشى ساۋىرگە دەيىن جالعاسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
كەيىن جۇمىستار ىلە الاتاۋى ۇلتتىق تابيعي پاركىندە قويىلادى.
ارت-جوبا تابيعاتتى لاستاۋشىلارمەن كۇرەسكە ارنالعان. ونى ۇيىمداستىرۋشىلار قاتىسۋشىلاردان شارا اياسىندا تاۋداعى تازالىقتى ساقتاۋدى ناسيحاتتاۋ ماقساتىندا جاسالعان پلاكاتتارمەن جەكە پاراقشالارىندا ءبولىسۋدى سۇرايدى.
«ىلە-الاتاۋ ۇلتتىق تابيعي پاركى قىزمەتكەرلەرىنىڭ مالىمەتىنشە، پارككە جاقىن ورنالاسقان بۋتاكوۆكا، قيماسار، الماراسان باعىتىنىڭ وزىنەن-اق جىل سايىن 700-دەن 900 تونناعا دەيىن قوقىس شىعارىلادى ەكەن. ال ەلىمىز بويىنشا تابيعاتتاعى تازالىق ماسەلەسى ادام شوشىرلىق جاعدايدا، ال مۇنى ءبىز بىرلەسىپ توقتاتۋىمىز كەرەك»، - دەدى بىرلەسكەن جۇمىستىڭ ماڭىزدىلىن اتاي وتىرىپ، ەكو-بەلسەندى جانە #تازاتاۋ ەكولوگيانى قولداۋعا ارنالعان باستامانىڭ باستى ۇيىمداستىرۋشىسى اجار جاندوسوۆا.
كورمەدە 27 قاتىسۋشىنىڭ ءتۇرلى جانرداعى 42 جۇمىسى قويىلادى. قازاقستاندىق سۋرەتشىلەر، يلليۋستراتورلار مەن ديزاينەرلەردەن بايقاۋ اياسىندا كەلىپ تۇسكەن بارلىق جۇمىستار ءادىل قازىلار القاسىنىڭ ءبىراۋىزدان شىعارىلعان شەشىمىمەن كورمەگە قويىلاتىن بولدى. بايقاۋ جەڭىمپازدارى ۆەرنيساجدا جاريالانادى.
ارت-كۋراتور وليا ۆەسەلوۆانىڭ ايتۋىنشا، بايقاۋعا قاتىسۋشىلاردان بولەك كورمەدە الەمگە ايگىلى گەورگيي ترياكين-بۋحاروۆ، ساۋلە سۇلەيمەنوۆا، شاميل گۋلييەۆ سەكىلدى سۋرەتشىلەردىڭ قورشاعان ورتاعا زيانىن ەرەكشەلەپ كورسەتەتىن كارتينالارى قويىلادى. Plastic_Harahura توبىنىڭ قايتا وڭدەلگەن پلاستيكتان جاسالعان سكۋلپتۋراسى ەكسپوزيسيانىڭ بولىگى بولادى.