تۇرعىننىڭ سۇراعى:
الماتىدا جەڭىس كۇنىنە بايلانىستى تۇرعىننىڭ سۇراعى:
- الدىمىزدا 9 مامىر. ۇوس-نىڭ ارداگەرلەرىنىڭ قاتارى، وكىنىشكە وراي، جىل سايىن ازايىپ كەلەدى. وتكەن جىلدارى ولارعا ماتەريالدىق كومەك كورسەتىلدى. بىلەيىن دەگەنىم، بيىل سوعىس ارداگەرلەرىنە كومەك قاراستىرىلعان با؟ ەكىنشى سۇراعىم - اۋعان ارداگەرلەرىنە دە قانداي دا ءبىر كومەك كورسەتىلە مە؟
الماتى قالاسىنىڭ اكىمى ەربولات دوسايەۆتىڭ جاۋابى:
- 9 مامىر - ءبارىمىز ءۇشىن قاسيەتتى مەرەكە. ءيا، وكىنىشكە وراي، ءبىزدىڭ ارداگەرلەرىمىز جىل سايىن ازايىپ كەلەدى. سوڭعى مالىمەتتەر بويىنشا، الماتىدا 58 ارداگەر تۇرادى. مەن ولاردىڭ بارلىعى ءوز مەرەكەلەرىن امان-ەسەن قارسى العانىن قالايمىن جانە ءبىز ولاردى قۇتتىقتاۋعا مۇمكىندىك الدىق. كومەك تۋرالى – قاراجات قاراستىرىلعان، ءبىز ءاربىر ۇوس ارداگەرىنە ميلليون تەڭگەدەن تولەۋدى جوسپارلادىق. ەرتەڭ ءماسليحات وتىرىسى وتەدى، مەن دەپۋتاتتاردان ولارعا 1،5 ملن تەڭگەدەن تولەۋ ءۇشىن تاعى بەس ءجۇز مىڭ قوسۋدى سۇرادىم.
اۋعان جاۋىنگەرلەرىنە، تىل ەڭبەككەرلەرىنە جانە باسقالارعا دا ماتەريالدىق كومەك كورسەتەمىز. 9 مامىردا ءداستۇرلى تۇردە 28 گۆاردياشى-پانفيلوۆشىلار اتىنداعى ساياباقتا گۇلشوقتارى قويىلادى، مەرەكەلىك كونسەرت بولادى. ءبىزدىڭ ارداگەرلەرگە قالانىڭ بارلىق اۋداندارىندا قۇرمەت كورسەتىلەدى.
ءبىز بۇل مەرەكەگە ەرەكشە دايىندالىپ، ۇلكەن نازار اۋدارامىز. مەرەكەگە ءوزى قاتىسا المايتىن ارداگەرلەرگە جەكە كوڭىل بولەمىز – اۋدان اكىمدەرىمەن بىرگە مەن ءوزىم ولاردىڭ ءارقايسىسىنا بارىپ، جەڭىس كۇنىمەن جەكە قۇتتىقتايمىز.