الماتىداعى ەكومادەنيەت: قالادا «تازا قازاقستان» تۇجىرىمداماسىن جۇزەگە اسىرۋ بويىنشا ءىس-قيمىل جوسپارى قابىلداندى
الماتىدا قالا ءماسليحاتىنىڭ كەزەكتەن تىس XXIX سەسسياسىندا 2025–2029 جىلدارعا ارنالعان «تازا قازاقستان» تۇجىرىمداماسىن جۇزەگە اسىرۋ بويىنشا ءىس-قيمىل جوسپارى بەكىتىلدى. بۇل قۇجاتتى مەملەكەت باسشىسىنىڭ ەلدەگى ەكولوگيالىق جاعدايدى جاقسارتۋ جونىندەگى تاپسىرماسىن ورىنداۋ اياسىندا قالاىڭ ەكولوگيا جانە قورشاعان ورتانى قورعاۋ باسقارماسى ازىرلەگەن.
جوسپار 2024 جىلى قازاندا قازاقستان رەسپۋبليكاسى ۇكىمەتى بەكىتكەن «تازا قازاقستان» تۇجىرىمداماسىنا نەگىزدەلگەن. ونىڭ باستى ماقساتى – الماتىدا بالاباقشا مەن مەكتەپتەن باستاپ، كورپوراتيۆتىك كەڭسە مەن قالالىق قاۋىمداستىققا دەيىنگى شىنايى ەكولوگيالىق مادەنيەتتى قالىپتاستىرۋ.
جوسپار ءۇش نەگىزگى باعىتتى قامتيدى: تۇرعىندار اراسىندا ەكولوگيالىق ويلاۋدى دامىتۋ، ەكولوگيالىق اعارتۋشىلىقتى ىلگەرىلەتۋ جانە ەكولوگيالىق ءبىلىم بەرۋ جۇيەسىن كەڭەيتۋ. قۇجات اياسىندا اۋا ساپاسىن اۆتوماتتى باقىلاۋ جۇيەلەرىن ورناتۋ، قالدىقتاردى قايتا وڭدەۋ ينفراقۇرىلىمىن دامىتۋ، ەكوەرىكتىلىكتى قولداۋ، سونداي-اق، «جاسىل مەكتەپ» جانە «جاسىل كەڭسە» جوبالارىن ەنگىزۋ شارالارى كوزدەلگەن.
ايتا كەتەيىك، قابىلدانعان جوسپار بەكىتىلگەن ساتتەن باستاپ كۇشىنە ەنەدى جانە الداعى جىلدارى الماتىدا ەكولوگيالىق مادەنيەتتى دامىتۋ بويىنشا جۇيەلى جۇمىستىڭ نەگىزى بولادى.
ەستەرىڭىزگە سالا كەتەيىك، «تازا قازاقستان» رەسپۋبليكالىق اكسياسى پرەزيدەنت قاسىم-جومارت توقايەۆتىڭ تاپسىرماسىمەن ەلدى مەكەندەردىڭ اۋماعىن كوركەيتۋ جانە كوگالداندىرۋ ماقساتىندا ىسكە اسىرىلۋدا جانە حالىق اراسىندا قورشاعان ورتاعا ۇقىپتى قاراۋ قۇندىلىقتارىن قالىپتاستىرۋعا، جوعارى ازاماتتىق جاۋاپكەرشىلىك پەن ەكولوگيالىق مادەنيەتتى تاربيەلەۋگە باعىتتالعان.
الماتىدا وسى اكسيا اياسىندا ەكىنشى جىل قاتارىنان «الماتى – ورتاق ءۇيىمىز» اتتى ەكولوگيالىق ناۋقان وتكىزىلۋدە. قالانىڭ تۇرعىندارى تازالاۋ، قالانى كوركەيتۋ جانە كوگالداندىرۋ جۇمىستارىنا بەلسەندى قاتىسۋدا. بيىل ەكوناۋقان 1 ناۋرىز بەن 1 ءساۋىر ارالىعىندا ءوتتى، ونىڭ بارىسىندا 4 مىڭنان استام اۋلا اۋماقتارى، 445 قالا ساياباعى پەن سكۆەرلەر، 2 مىڭنان استام كوشە تازارتىلدى، 600-دەن استام زاڭسىز ساۋدا نىسانى الىنىپ تاستالدى، 3 مىڭنان استام كوشەدەگى قوقىس جاشىگى ورناتىلدى، سونداي-اق، 20 مىڭعا جۋىق اعاش پەن بۇتا وتىرعىزىلدى.
بۇعان قوسا، «الماتى – ورتاق ءۇيىمىز» ناۋقانى اياسىندا ءارتۇرلى بايقاۋلار مەن باستامالار ۇيىمداستىرىلدى. ولاردىڭ ىشىندە: «تازا اۋا» اكسياسى، «قورشاۋىڭدى بويا»، «جاقىنىڭا جاردەمدەس»، «مەرزىمى وتكەن دارىلەردى تاپسىرىپ، تابيعاتتى ساقتا» اكسيالارى، «ۇزدىك كوممۋنالدىق قىزمەتكەر» بايقاۋى، سونداي-اق، 50 مىڭنان استام ادام قاتىسقان جانە 8 مىڭ تەكشە مەتردەن استام قوقىس جينالىپ، شىعارىلعان Almaty Clean & Green جالپىقالالىق سەنبىلىگى بار.