الماتىدا «تازا قازاقستان» رەسپۋبليكالىق ەكولوگيالىق اكسياسى اياسىندا جەرگىلىكتى سەنبىلىك ۇيىمداستىرىلدى، دەپ حابارلايدى aqshamnews.kz
بۇل تۋرالى قالالىق كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى حابارلادى.
ءىس-شاراعا مەملەكەتتىك ورگانداردىڭ وكىلدەرى، كوممۋنالدىق قىزمەتتەر، بيزنەس قۇرىلىمدارى مەن قالا تۇرعىندارى قاتىستى. سەنبىلىككە جالپى 2300-دەن استام ادام جانە 211 ارنايى تەحنيكا جۇمىلدىرىلىپ، شامامەن 1680 تەكشە مەتر قوقىس شىعارىلدى.
سەنبىلىك قالانىڭ بارلىق سەگىز اۋدانىندا ءوتتى. ارىق جەلىلەرى مەن قوعامدىق كەڭىستىكتەر تازالانىپ، جول بويى سىپىرىلىپ، جۋىلدى، ىرگەلەس اۋماقتار مەن شاعىن بيزنەس نىساندارى اباتتاندىرىلدى. كوگالداندىرۋ جۇمىستارىنا ەرەكشە نازار اۋدارىلىپ، 2 مىڭنان استام ۇيەڭكى، قاراعاي، جوكە جانە قاراعان اعاشتارى وتىرعىزىلدى.
سەنبىلىك وتكەن نەگىزگى اۋماقتار:
- الاتاۋ اۋدانى: اققاينار كوشەسى – ۇاك بويى – مامبەتوۆ كوشەسى ارالىعى؛
- المالى اۋدانى: جەلتوقساي – اباي – سەيفۋللين – رايىمبەك كوشەلەرىنىڭ اۋماعى؛
- اۋەزوۆ اۋدانى: قارعالى وزەنىنىڭ جاعالاۋى (اباي داڭعىلىنان رايىمبەك داڭعىلىنا دەيىن)؛
- مەدەۋ اۋدانى: قازاقستان حالىقتارى ەرتەگىلەرى ساياباعى، تاتتىبەكوۆ كوشەسى، 61؛
- بوستاندىق اۋدانى: اباي داڭعىلىنىڭ بايزاقوۆ پەن تۇرعىت وزال كوشەلەرى اراسىنداعى ءبولۋ جولاعى؛
- جەتىسۋ اۋدانى: ماياك شاعىناۋدانى، بوكەيحانوۆ كوشەسى، 53ا/2؛
تۇركسىب اۋدانى: ماياك شاعىناۋدانى؛
ناۋرىزباي اۋدانى: «الما سيتي» تۇرعىن ءۇي كەشەنى، الاتاۋ داڭعىلىنىڭ بويى.
قاتىسۋشىلاردىڭ بىرلەسكەن ەڭبەگىنىڭ ارقاسىندا جاسىل ايماقتار رەتكە كەلتىرىلىپ، ارىقتار مەن تروتۋارلار تازارتىلدى، اعاشتىڭ بۇتاقتارى سانيتارلىق ماقساتتا كەسىلىپ، ءشوپ شابىلدى.