جاڭا تۋعان نارەستەلەرگە مەرەكە كۇنىنە وراي «ءسۇيىنشى» سىيقورابى تارتۋ ەتىلدى
الماتىدا مەرەكە كۇندەرى دۇنيەگە كەلگەن 215 نارەستەگە تابىستالعان «ءسۇيىنشى» سىيقورابىنا بوبەكتەرگە قاجەتتى زاتتاردان بولەك ق ر پرەزيدەنتى قاسىم-جومارت توقايەۆتىڭ قۇتتىقتاۋ تىلەگى جازىلعان اشىق حات، «تاۋەلسىز قازاقستانعا 30 جىل» مونەتاسى مەن بالانىڭ تۋۋى تۋرالى كۋالىگى سالىنعان، دەپ حابارلايدى اlmaty-akshamy.kz
«اينالايىن، بوبەك! سەنىڭ تۋعان كۇنىڭ ەلىمىزدىڭ ەڭ باستى مەرەكەسىمەن تۇسپا-تۇس كەلدى. ءوزىڭ دۇنيە ەسىگىن اشقان كەزدە حالقىمىز قاستەرلى تاۋەلسىزدىگىنىڭ 30 جىلدىعىن اتاپ ءوتىپ جاتتى. ساعان باقىتتى ءارى ۇزاق عۇمىر تىلەيمىن!» - دەپ جازىلعان پرەزيدەنتتىڭ قۇتتىقتاۋىندا.
«الماتى قالاسى بويىنشا مەرەكە كۇندەرى 215 بالا دۇنيەگە كەلدى. ارنايى بىرنەشە كۇن پرەزيدەنتتىڭ قۇتتىقتاۋى مەن ءسابي بوكستارىن جەتكىزۋ ءۇشىن، ولاردى دايىنداۋ جۇمىستارى جۇرگىزىلدى"، - دەيدى «ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى بويىنشا فيليالىنىڭ ديرەكتورى ەرمەك قۇرالبەك ۇلى بەكجۇنىسوۆ.
بارلىق baby-بوكستار يەلەرىنە ۋاقىتىلى جەتكىزىلىپ، ءوز كەزەگىندە انالار دا العىستارىن ءبىلدىردى.
«دۇنيەگە ءسابيىمىز كەلىپ ءبىر قۋانساق، «ءسۇيىنشى» قورابىن الىپ قۋانىشىمىز ەسەلەنىپ جاتىر. ونىڭ ۇستىنە ءسابيىمىز مەرەكە كۇنى دۇنيەگە كەلدى... قۋانىشىمدا شەك جوق. پرەزيدەنتتىڭ ءوزى قۇتتىقتاۋ حاتىن جولداپ جاتسا، نەگە قۋانباسقا؟! بالام قازاقستان رەسپۋبليكاسىنىڭ باقىتتى بالالارىنىڭ ءبىرى بولىپ وسەدى دەپ سەنەمىن! ومىرگە العاشقى كەلگەن كۇننەن قۇرمەتكە يە بولىپ جاتىر... ەلىمىزدە انالار دا، بالالار دا باقىتتى بولسىن!» - دەيدى الماتى قالاسىنىڭ تۇرعىنى ەسكەلدينوۆا گۇلفيا ەدىلحان قىزى.
«16 جەلتوقسان - مەرەكە كۇنى مەنىڭ ۇلىم دۇنيەگە كەلدى. وتە باقىتتىمىن. وعان سايان ەسىمى بەرىلدى. ول ءبىزدىڭ ءۇشىنشى بالامىز. بۇگىن بىزگە پرەزيدەنتتىڭ قۇتتىقتاۋى مەن سىيلىق اكەلدى. كۇتپەگەن، كەرەمەت جاعىمدى جاڭالىق بولدى. قوراپتا انا مەن بالاعا قاجەت نارسەنىڭ ءبارى بار. ۇيىمداستىرۋشىلارعا راحمەت! بارشاڭىزدى مەرەكەمەن قۇتتىقتايمىن، حالقىمىزعا باقىت، وركەندەۋ، ساتتىلىك، دەنساۋلىق تىلەيمىن. ەلىمىزدە ءبارى جاقسى بولسىن!»- دەدى دينارا.
ال جالپى ەلىمىز بويىنشا تاۋەلسىزدىك كۇنى دۇنيەگە كەلگەن 2 مىڭنان استام سابيگە baby-بوكستار سىيعا تارتىلعانىن ايتا كەتۋ قاجەت.