قار كوشكىنى ءتۇسىپ، ءبىر تۋريست تومەنگە قاراي سىرعىپ تۇسكەن.
الماتىلىق قۇتقارۋشىلار قار كوششكەن كەزدە تاۋدا بولعان تۋريستەردى امان الىپ قالدى، دەپ حابارلايدى اlmaty-akshamy.kz ق ر توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.
باسپا ءسوز قىزمەتىنىڭ مالىمەتتەرىنە قاراعاندا، 2023 جىلعى 1 ساۋىردە ساعات 16:35-تە تجم رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەچەرلىك بولىمشەسىنە الماتى قالاسى تجد جەدەل كەزەكشىسىنەن شاقىرۋ كەلىپ تۇسكەن.
ءۇش ادام بۋتاكوۆ اسۋىنان بۋكرەيەۆ شىڭىنا كوتەرىلىپ بارا جاتقان ۋاقىتتا قار كوشكىنى ءجۇرىپ، ءبىر تۋريست تومەنگە قاراي سىرعىپ تۇسكەن. وسىعان بايلانىستى بەس ادامنان تۇراتىن رەسپۋبليكالىق جەدەل-قۇتقارۋ جاساعىنىڭ قۇتقارۋ توبى كومەككە اتتاندى. سونىمەن قاتار، ادامداردى ىزدەۋگە الماتى قالاسىنىڭ قۇتقارۋ قىزمەتىنىڭ قۇتقارۋشىلارى قوسىمشا جىبەرىلدى.
رەسپۋبليكالىق جەدەل-قۇتقارۋ جاساعىنىڭ كەزەكشىسى وقيعا ورنىنىڭ لوكاسياسىن جىبەرگەن ءوتىنىش بەرۋشىمەن بايلانىسقا شىقتى. ول تۋريستىك مارشرۋت بويىنشا تاۋعا كوتەرىلۋ كەزىندە قار كوشكىنى سالدارىنان جولداستارىنان قالىپ قويعان. ەشقايدا جۇرمەي، قۇتقارۋشىلاردىڭ كومەگىن كۇتكەن. تۋريستەرمەن ۇيالى بايلانىس ارقىلى بايلانىسقا شىققان قۇتقارۋشىلار ساعات 18.43-تە زارداپ شەككەندەرمەن ۆيزۋالدى بايلانىس ورناتقان.
20 مينۋتتان كەيىن رجقج قۇتقارۋ توبى تۋريستەرگە جەتىپ، زارداپ شەككەندەردى تومەنگە ءتۇسىرۋ جۇمىستارىن باستادى. ساعات 19:55-تە تۋريستەردى تومەن ءتۇسىرۋ جۇمىستارى اياقتالدى، قۇتقارۋشىلار ولاردى بۋتاكوۆ شاتقالىنداعى اۆتوتۇراققا دەيىن جەتكىزدى. ادامدارعا مەديسينالىق كومەك قاجەت بولمادى.
تجم قۇتقارۋشىلارى تاۋدا قالعان تۋريستەرگە بارلىق قاۋىپسىزدىك شارالارىن ساقتاۋعا كەڭەس بەرەدى. تاۋعا شىققان كەزدە ءوز كۇشىڭىزدى ەسەپتەڭىز، قۇتقارۋ قىزمەتتەرىنىڭ اۋا رايى جاعدايلارى، كوشكىن ءقاۋپى دەڭگەيى تۋرالى ۇسىنىستارىن ەسكەرىڭىز، تاۋداعى سەرۋەنگە وزىڭىزبەن بىرگە پاۋەربانك، سۋ وتكىزبەيتىن پاكەتتەگى سىرىڭكە، سۋ، قوسىمشا جىلى كيىم-كەشەك، GPS ناۆيگاتورى، ت.ب قاجەتتى زاتتاردى الا شىعىڭىز .
«ەگەر سىزگە كومەك قاجەت بولسا، 112 نەمەسە 8(727) 372-15-60 (تجم رەسپۋبليكالىق جەدەل-قۇتقارۋ جاساعىنىڭ كەزەكشى-ديسپەچەرلىك بولىمشەسى) قوڭىراۋ شالىڭىز»، - دەلىنگەن حابارلامادا.