الماتىدا قوعامدىق كولىك جۇرگىزۋشىلەرى مەن جولاۋشىلارى ءۇشىن قاۋىپسىزدىك شارالارى تالقىلاندى
تالقىلاۋ جولاۋشىلار تاسىمالىمەن اينالىساتىن كولىك كاسىپورىندارىنىڭ بىرىندە وتكەن جيىن اياسىندا بولدى. وندا ءۇشىنشى ادامداردىڭ زاڭسىز ارەكەتتەرىنەن جۇرگىزۋشىلەر مەن جولاۋشىلاردىڭ قاۋىپسىزدىگىن ارتتىرۋ بويىنشا وڭىرلىك شارالار ازىرلەندى.
– 11-15 قاڭتار ارالىعىندا رەسپۋبليكا اۋماعىندا جەرگىلىكتى اتقارۋشى ورگاندارمەن، كولىك مينيسترلىگى كولىك كوميتەتىنىڭ اۋماقتىق بولىمشەلەرىمەن جانە جۇرتشىلىق وكىلدەرىمەن بىرلەسە وتىرىپ، «تاسىمالداۋشى» جەدەل-پروفيلاكتيكالىق ءىس-شاراسى ءوتىپ جاتىر. باستى ماقسات – قوعامدىق كولىكتەگى كەز كەلگەن قۇقىق بۇزۋشىلىققا “مۇلدەم توزبەۋشىلىك” جانە جۇرگىزۋشىلەر مەن جولاۋشىلاردىڭ قاۋىپسىزدىگىن قامتاماسىز ەتۋ، – دەدى الماتى قالالىق پد اكىمشىلىك پوليسيا باسقارماسى باستىعىنىڭ ورىنباسارى بولاتبەك باياتانوۆ.
پوليسيادا قوعامدىق كولىك سالونىن “102” ارناسىنا شىعاتىن دابىل تۇيمەلەرىمەن جانە كولىك ۇيىمىنىڭ ديسپەچەرلىك قىزمەتىمەن جابدىقتاۋ، ريەۆيزيا جۇرگىزۋ جانە اۆتوبۋستاردى بەينە جانە دىبىس جازۋ فۋنكسيالارى بار باقىلاۋ كامەرالارىمەن جاڭارتۋ ماسەلەلەرىن قاراستىرۋدى، سونداي-اق كولىك ۇيىمىنىڭ ديسپەچەرلىك قىزمەتى، كولىك جۇرگىزۋشىلەرىنە توتەنشە جاعدايلار جانە قاۋىپسىزدىككە ءقاۋىپ تونگەن جاعدايدا كولىكتى تولىعىمەن توقتاتۋ شارالارىن قابىلداۋدى جانە “102” ارناسى ارقىلى دەرەۋ پوليسياعا حابارلاۋدى ۇسىنادى.