بىلتىرعى قىركۇيەكتەن باستاپ بيىلعى اقپاننىڭ باسىنا دەيىن بۇل دەرەك ايتىلماي كەلگەن.
ەكى جاسار بالا ۇزاق ۋاقىت الماتى اۋرۋحانالارىنىڭ بىرىندە بولعان ەدى، دەپ حابارلايدى Almaty-akshamy.kz
مەدەۋ اۋدانىنىڭ قورعانشىلىق جانە قامقورشىلىق ورگاندارىنىڭ اقپاراتىنا سايكەس، الماتى اۋرۋحانالارىنىڭ بىرىندەگى ەكى جاسار تاستاندى ءسابي اكەسىنە قايتارىلدى. ۆەدومستۆونىڭ مالىمەتىنشە، اكەسى قاجەت قۇجاتتاردى ۇسىنعاننان كەيىن، 17 ناۋرىزدا بالا تۋىستارىنا بەرىلگەن.
«اكەسى ەكەنىن دالەلدەيتىن قۇجاتتاردى كورسەتتى. سوندىقتان قامقورشىلىق جانە قورعانشىلىق ورگاندارى بالانى اكەسىنە تاپسىردى»، - دەدى الماتى قالاسى ءبىلىم باسقارماسىنىڭ قامقورشىلىق جانە قورعانشىلىق ءبولىمىنىڭ باسشىسى جاننا تاسيروۆا.
ەسكە سالايىق، ەكى جاسار بالا ۇزاق ۋاقىت الماتى اۋرۋحانالارىنىڭ بىرىندە بولعان ەدى. بىلتىر قىركۇيەكتەن باستاپ بيىل اقپاننىڭ باسىنا دەيىن بۇل دەرەك ايتىلماعان. ءبىراق كەيىنىرەك بۇل جاعداي الەۋمەتتىك جەلىلەردە جاريالاندى، ءسويتىپ، ول قوعامدىق رەزونانس تۋدىردى.
بالا 22 قىركۇيەكتە Asia Park سوو ماڭىنان تابىلعان. سونىمەن قاتار، ونىڭ قاسىندا ءوزىن بالانىڭ اكەسىمىن دەپ تانىستىرعان ەر ادام بولعان. ونىڭ ايتۋىنشا، ولار جامبىل وبلىسىنىڭ مەركە اۋىلىنان كەلگەن جانە بالاسىمەن بىرگە تۇراتىن جەرى بولماعان. ەر ادام اناسى بالانى تاستاپ، بەلگىسىز باعىتتا كەتىپ قالعانىن، بالاعا قۇجاتتار جاساماعانىن ايتقان ەدى.
پوليسەيلەر بالانىڭ ءومىرى مەن دەنساۋلىعىنا ءقاۋىپ ءتونىپ تۇرعاسىن، ونى اۋرۋحاناعا جەتكىزگەن. تەكسەرىستەن كەيىن 37 جاستاعى ەر ادام بالا اۋرۋحانادا جاتقان كەزدە قۇجاتتار جاساپ، باسپانا تابۋعا ۋادە بەردى. الايدا وسىدان كەيىن ەر ادام جوعالىپ كەتكەن.
الەۋمەتتىك جەلىلەردەگى ايقاي-شۋدان كەيىن اكەسى بولۋى مۇمكىن ەر ادام قايتا پايدا بولعان. سونداي-اق، تاستاندى بالانىڭ اجەسى بولۋى مۇمكىن ادام دا تابىلعان. كەيىنىرەك بالانىڭ اكەسىنە بەرىلەتىنى بەلگىلى بولدى.