بۇل جولى چەرنوۆيسكايا كوشەسى، 10 مەكەنجايىندا ورنالاسقان ءۇش قاباتتى ءۇي سۇرىلەدى. بۇل تۋرالى الماتىنىڭ قالا قۇرىلىسى باقىلاۋ باسقارماسى حابارلادى.
مەنشىك يەسى (جەكە تۇلعا) قۇرىلىسقا رۇقسات قۇجاتتارىنسىز كىرىسكەن – سجت، ەسكيزدىك جوبا كەلىسىمى، جوبا ساراپتاماسى جانە قۇرىلىس-مونتاج جۇمىستارىنىڭ باستالعانى تۋرالى حابارلاما بولماعان.
تۇرعىننىڭ ءوتىنىشى بويىنشا جوسپاردان تىس تەكسەرىس ناتيجەسىندە مەنشىك يەسىنە قاتىستى اكىمشىلىك شارالار قابىلداندى.
كەيىن الماتى قالاسىنىڭ جەتىسۋ اۋداندىق سوتى باسقارمانىڭ تالاپ-ارىزى نەگىزىندە 2023 جىلى 7 قىركۇيەكتە زاڭسىز سالىنعان ءۇش قاباتتى تۇرعىن ءۇيدى بۇزۋ تۋرالى شەشىم شىعاردى.
نىسان مەنشىك يەسىنىڭ ەرىكتى تۇردە، سوت ورىنداۋشىلارىنىڭ قاتىسۋىمەن بۇزىلىپ جاتىر.
ەسكە سالا كەتەيىك، الماتى اكىمى ەربولات دوسايەۆتىڭ قۇرىلىسقا باقىلاۋدى كۇشەيتۋ جونىندەگى تاپسىرماسى اياسىندا 2023 جىلدىڭ باسىنان بەرى 63 زاڭسىز نىسان، سونىڭ ىشىندە «مەچتا»، KHAN تۇرعىن ءۇي كەشەندەرى جانە باسقا دا نىساندار تولىق نەمەسە جارتىلاي سۇرىلگەن.