مەملەكەت باسشىسىنىڭ «ادال ادام – ادال ەڭبەك – ادال تابىس» ۇلتتىق قۇرىلتاي وتىرىسىنداعى تاپسىرماسىنا سايكەس، 2024 جىلى 1 700 شاقىرىمنان استام گاز قۇبىرى سالىنىپ، 300 مىڭنان استام ازامات كوگىلدىر وتىنعا قول جەتكىزدى، دەپ حابارلايدى aqshamnews.kz
ەلدى مەكەندەردى گازداندىرۋ حالىقتىڭ ءومىر ساپاسىن جاقسارتۋمەن قاتار ەكولوگيانىڭ لاستانۋىن تومەندەتۋگە، بالامالى وتىن ساتىپ الۋعا جۇمسالاتىن قاراجاتتى ۇنەمدەۋگە جانە وڭىرلەردىڭ ينۆەستيسيالىق تارتىمدىلىعىن ارتتىرۋعا مۇمكىندىك بەرەدى.
2025 جىلى ەلدى گازداندىرۋ دەڭگەيىن 62%-عا جەتكىزۋ كوزدەلگەن، بۇل 12،4 ميلليوننان استام تۇرعىننىڭ تابيعي گازعا قول جەتكىزۋىن قامتاماسىز ەتەدى. بۇل ماقساتتا مەملەكەت 7 ەلدى مەكەندى گازداندىرۋعا ارنالعان 45 جوبانى ىسكە اسىرۋ ءۇشىن 65،9 ميلليارد تەڭگە ءبولدى.
«فينسكايا-120» اۆتوماتتاندىرىلعان گاز رەتتەۋ ستانسياسى مەن ماگيسترالدىق گاز قۇبىرىنىڭ قۇرىلىسى اتىراۋ وبلىسىنداعى ءىرى جوبالاردىڭ ءبىرى سانالادى. جوبا اتىراۋ قالاسىنىڭ ەۋروپالىق بولىگىن گازبەن قامتاماسىز ەتۋدى جاقسارتىپ، ءوڭىردىڭ ونەركاسىپتىك دامۋىنا سەرپىن بەرەدى.
تابيعي گازدى پايدالانۋ ەكولوگيالىق جاعدايدى جاقسارتۋعا ىقپال ەتەدى. كومىرقىشقىل گازىنىڭ شىعارىندىلارى تومەن دەڭگەيدە، زياندى قوسپالار جوق، ال كومىر مەن مازۋتپەن سالىستىرعاندا ەنەرگيا تيىمدىلىگى جوعارى.
مەملەكەت باسشىسىنىڭ «الەۋمەتتىك ءاميان» تەتىگىن ەنگىزۋ تۋرالى تاپسىرماسى اياسىندا ۇكىمەت 2024 جىلى باتىس قازاقستان وبلىسى مەن شىمكەنت قالاسىندا حالىقتىڭ الەۋمەتتىك وسال توپتارى ءۇشىن تاۋارلىق گازعا جەڭىلدىكتەر ەنگىزدى. بۇل پيلوتتىق جوبا 6 مىڭنان استام ازاماتتى قامتىدى. ءساتتى جۇزەگە اسىرىلعان جاعدايدا تەتىك بۇكىل ەل بويىنشا ەنگىزىلمەك.
سونىمەن قاتار، «تالدىقورعان – ءۇشارال» ماگيسترالدىق گاز قۇبىرىنىڭ قۇرىلىسى قارقىندى جۇرگىزىلۋدە. ۇزىندىعى 302 شاقىرىم بولاتىن بۇل جوبا جەتىسۋ وبلىسىنداعى 124 مىڭ تۇرعىندى تابيعي گازبەن قامتاماسىز ەتۋگە مۇمكىندىك بەرەدى.
قاشاعان كەن ورنىندا قۋاتى جىلىنا 1 ميلليارد تەكشە مەتر بولاتىن گاز وڭدەۋ زاۋىتىنىڭ قۇرىلىسى جالعاسۋدا. بۇل ىشكى تۇتىنۋعا ارنالعان تاۋارلىق گاز كولەمىن جىلىنا 700 ميلليون تەكشە مەترگە ۇلعايتۋعا مۇمكىندىك بەرەدى. سونىمەن قاتار، قاشاعان شيكىزات بازاسىندا سۇيىتىلعان مۇناي گازىن ءوندىرۋ كەشەنى سالىنىپ جاتىر. جوبا 2026 جىلدان باستاپ قوسىمشا سۇيىتىلعان گاز كولەمىن ىشكى نارىققا جەتكىزىپ، مۇناي-گاز حيمياسىن دامىتۋعا ىقپال ەتەدى.
