الماتىدا تۇرعىنداردىڭ جاڭعىرتىلعان تاعى ءبىر سيفرلىق كەڭسەسى اشىلدى. ول اۋەزوۆ اۋدانى، جاندوسوۆ كوشەسى، 51 مەكەنجايىندا ورنالاسقان. ايتا كەتەر بولساق، بۇل قالاداعى ءۇشىنشى جاڭعىرتىلعان ورتالىق. ول الدىڭعى ورتالىقتار سياقتى Kaizen ءپرينسيپى بويىنشا جوسپارلانعان.
وسىلايشا، سيفرلىق كەڭسە ءتۇرلى ءتۇستى گاممالارمەن بولىنگەن بىرنەشە سەكتورلاردان تۇرادى. مىسالى جىلدامدىق ايماعى سارى تۇسپەن ايرىقشالانادى. بۇل ايماقتا 5-10 مينۋتتا الۋعا بولاتىن قىزمەتتەر كورسەتىلەدى. سونىمەن قاتار، قۇجاتتاندىرۋ ءبولىمى قىزىل تۇستە بولسا، دايىن قۇجاتتاردى بەرۋ ءبولىمى جاسىل تۇسكە يە. كۇلگىن ءتۇستى ايماق – جايلىلىق ايماعى، بۇل جەردە ازاماتتار رەتتەۋ زالىندا كورسەتىلەتىن ادەتتەگى قىزمەتتەردى، ياعني زاڭدى تۇلعالاردى، جىلجىمايتىن مۇلىكتەردى تىركەۋ ت.س. سياقتى قىزمەتتەردى الۋلارىنا بولادى. سارعىش ءتۇستى ايماقتا زەينەتاقى، جاردەماقى جانە باسقا دا تولەمدەردى راسىمدەيتىن الەۋمەتتىك قىزمەتتەر كورسەتىلەدى.
بۇدان باسقا، جاڭعىرتىلعان حقكو-دا قۇجاتتاما تەرمينالى ورناتىلعان. تەرمينال ارقىلى ءتولقۇجات پەن جەكە كۋالىككە ازاماتتار ءوز بەتىنشە ءوتىنىش بەرە الادى. دايىن قۇجاتتاردى بەرۋگە ارنالعان تاۋلىك بويى جۇمىس ىستەيتىن پوستومات تا بار.
سونىمەن قاتار، بۇل ورتالىقتىڭ سيىمدىلىعى كەڭ كولىك تۇراعى بار. كۇتۋ زالى دا اۋقىمدى، انا مەن بالا بولمەسى دە قاراستىرىلعان. اۋەزوۆ اۋدانىنداعى تۇرعىنداردىڭ سيفرلىق كەڭسەسىنە كۇنىنە 4000-عا جۋىق ازامات كەلەدى دەپ كۇتىلۋدە.
