الماتىدا تاەكۆوندودان جاسوسپىرىمدەر اراسىندا رەسپۋبليكالىق اشىق بىرىنشىلىك ءوتتى

700-گە جۋىق جاس سپورتشى سايىسقا ءتۇستى

الماتىدا تاەكۆوندو فەدەراسياسىنىڭ 30 جىلدىعى مەن ديحان احايەۆتىڭ 70 جىلدىعىنا وراي جاسوسپىرىمدەر اراسىندا رەسپۋبليكالىق اشىق بىرىنشىلىك ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.

چەمپيوناتقا ەلىمىزدىڭ ءبىرقاتار وڭىرىنەن 30 كوماندا قاتىسىپ، 700-گە جۋىق جاس سپورتشى سايىسقا ءتۇستى. شارانىڭ اشىلۋىندا ۇيىمداستىرۋشىلار تاەكۆوندونىڭ دامۋىنا ۇلەس قوسقان جانداردى ماراپاتتاپ، شىعىس جەكپە-جەگىنىڭ ادىس-تاسىلدەرىن كورسەتتى.

«بۇل سپورتتىق ءىس-شارادا ءبىزدىڭ جاستارىمىز شىنىعادى. ەرتەڭ سولاردىڭ اراسىنان ەلىمىزدىڭ، ازيانىڭ، حالىقارالىق چەمپيوندار شىعادى. ءبىزدىڭ كوك بايراعىمىزدى ۇلكەن جارىستاردا جەلبىرەتەدى دەگەن سەنىمدەمىن»، – دەدى تاەكۆوندو فەدەراسياسىنىڭ پرەزيدەنتى باقتيار ونەربايەۆ.

ۇيىمداستىرۋشىلار الماتىدا تاەكۆوندو سپورتىنىڭ جاقسى دامىپ كەلە جاتقانىن ايتادى. شىعىس جەكپە-جەك ونەرىنە ۇلداردان بولەك، قىز بالالار اراسىندا دا قىزىعۋشىلىق جوعارى ەكەن.  

«ناتيجەلەرى جاقسى. كورسەتكىشتەرى مىقتى. تاەكۆوندونى 2 جىل بۇرىنعىمەن سالىستىرعاندا ۇلكەن وزگەرىس بار»، – دەدى مامانداندىرىلعان جوعارى سپورت شەبەرلىگى مەكتەبىنىڭ ديرەكتورى ساعات سىرلىبايەۆ.