جيىنعا الماتى اكىمى ەربولات دوسايەۆ، سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعالي، ق ر سىبايلاس جەمقورلىققا قارسى ءىس-قيمىل اگەنتتىگى قوعامدىق كەڭەسىنىڭ ءتوراعاسى مارات ءباشىموۆ، ورتالىق جانە جەرگىلىكتى اۋماقتىق مەملەكەتتىك ورگانداردىڭ وكىلدەرى، قوعام قايراتكەرلەرى قاتىستى، دەپ حابارلايدى اlmaty-akshamy.kz.
وتىرىستى اشقان مەگاپوليس باسشىسى انتيكورمەن بىرلەسىپ الماتى تاۋ بوكتەرىندەگى قۇرىلىس سالاسىنا سىرتقى تالداۋ جۇرگىزىلگەنىن اتاپ ءوتتى. وسى سالادا سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋ ءۇشىن ءىس-شارالار كەشەنى ىسكە اسىرىلىپ جاتىر.
زاڭناماداعى ولقىلىقتى جويۋ ءۇشىن قالا اكىمدىگى «الماتى قالاسىنىڭ ەرەكشە مارتەبەسى تۋرالى» زاڭعا وزگەرىستەر مەن تولىقتىرۋلار ەنگىزۋگە باستاماشىلىق جاسادى. وسىلايشا، قالا قۇرىلىسىن باقىلاۋ باسقارماسى نىسانداردىڭ سەيسميكالىق اۋماقتاعى قۇرىلىس تالاپتارىنا سايكەستىگىن تەكسەرە الادى. سونداي-اق، باسقارما عيماراتتار مەن قۇرىلىستاردىڭ سەيسميكالىق توزىمدىلىگىن تەكسەرۋ بارىسىندا كۇردەلى نىساندارعا عزي-ىن تارتا الادى.
ماجىلىستە نىسانداردى پايدالانۋعا قابىلداۋ كەزىندە قالا قۇرىلىسىن باقىلاۋ ورگاندارىنىڭ قاتىسۋىن مىندەتتەيتىن نورما ەنگىزىلگەن قۇرىلىس كودەكسىنىڭ جوباسى قارالادى.
قالا اكىمدىگىنە الماتى اۋماعىندا قۇرىلىس سالۋ قاعيدالارىن بەكىتۋگە قۇقىق بەرەتىن زاڭنامالىق وزگەرىستەر بويىنشا ۇسىنىستار ەنگىزىلدى. ولاردا قاۋىپسىزدىكتىڭ بەلگىلەنگەن دەڭگەيىن قامتاماسىز ەتۋ ءۇشىن سەيسميكالىق توزىمدىلىك تالاپتارى بەلگىلەنەدى. بۇل ۇسىنىستار قولداۋ تاۋىپ، ماجىلىستە قاراستىرىلىپ جاتىر.
الماتى اكىمىنىڭ ورىنباسارى اسقار ءامرين بايانداماسىندا حابارلاعانداي، تاۋ بوكتەرىندەگى اۋماقتاردى ەگجەي-تەگجەيلى جوسپارلاۋ جوسپارىن (ەتج) زاڭسىز وزگەرتۋ فاكتىلەرىنىڭ جولىن كەسۋ، جەردىڭ نىسانالى ماقساتىن وزگەرتۋ، قۇرىلىس پەن باقىلاۋ قىزمەتىن جۇزەگە اسىرۋ كەزىندە تاۋەكەلدەردى بولدىرماۋ بويىنشا شارالار قابىلداندى. مەملەكەتتىك قىزمەتتى سيفرلاندىرۋ كەزىندە جانە جەردى مەملەكەت قاجەتىنە الۋ كەزىندە تاۋەكەلدەر جۇيەلى تۇردە جويىلادى. ەگەر ەتج-دا وزگەرىس نەمەسە تولىقتىرۋ نە اكىمدىك قاۋلىسى بولماعان كەزدە قالانىڭ سيفرلىق كارتاسىن ءوز بەتىنشە وزگەرتۋدىڭ تەحنيكالىق مۇمكىندىگى الىنىپ تاستالادى.
جيىن سوڭىندا ەربولات دوسايەۆ ق ر سىبايلاس جەمقورلىققا قارسى ءىس-قيمىل اگەنتتىگىمەن بىرلەسىپ قۇرىلىس سالاسىنداعى سىبايلاس جەمقورلىق العىشارتتارىنىڭ ءتيىمدى الدىن الۋ جانە جويۋ جونىندەگى كەشەندى جۇمىس جالعاساتىنىن جانە تۇراقتى باقىلاۋدا بولاتىنىن اتاپ ءوتتى. قالا باسشىسى اكىمدىكتىڭ جاۋاپتى بولىمشەلەرىنە ءبىرقاتار تاپسىرما بەرىپ، الماتىدا، اسىرەسە تاۋ بوكتەرىندەگى ايماقتا قۇرىلىس ساپاسى مەن ازاماتتاردىڭ قاۋىپسىزدىگى جونىندەگى تالاپتاردىڭ ساقتالۋى باستى باسىمدىقتاردىڭ ءبىرى بولىپ تابىلاتىنىن ايتتى.