قوعامدىق دەنساۋلىق ساقتاۋ باسقارماسىنىڭ مالىمەتىنشە، الماتىدا ءسۇت بەزى وبىرى باسقا ونكولوگيالىق اۋرۋلاردىڭ ىشىندە ءبىرىنشى ورىندا تۇر، دەپ حابارلايدى Almaty-akshamy.kz.
"الماتىدا 9 ايدىڭ قورىتىندىسى بويىنشا ونكولوگيالىق اۋرۋلار قۇرىلىمىندا ءسۇت بەزى وبىرى ءبىرىنشى ورىندا – 589 (14،5%)، توق ىشەك وبىرى ەكىنشى ورىندا – 358 (8،8%)، وكپە وبىرى ءۇشىنشى ورىندا – 236 (5) .8%)"، - دەلىنگەن حابارلامادا.
ءسۇت بەزى قاتەرلى ىسىگىمەن 7640 ايەل ەسەپتە تۇر. الماتىدا جىل سايىن ءسۇت بەزى قاتەرلى ىسىگىمەن 700-گە جۋىق ايەل اۋىرادى. جىل باسىنان بەرى مەگاپوليستە 589 ايەلدىڭ وسى اۋرۋمەن اۋىراتىنى انىقتالسا، ونىڭ 527ء-سى اۋرۋدىڭ باستاپقى كەزەڭىندە.
"ءسۇت بەزى وبىرىن ەرتە انىقتاعاندا (1 جانە 2 كەزەڭدە) ەمدەلۋ ىقتيمالى وتە جوعارى جانە 90%-دان استام جاعدايدا ەمدەلەدى. 3 جانە 4 كەزەڭدە ەمدەۋ مۇمكىندىگى ايتارلىقتاي تومەندەيدى"، - دەدى الماتى ونكولوگيالىق ورتالىعىنىڭ ديرەكتورى نۇرسۇلتان ىزباعامبەتوۆ.
مامموگرافيا سكرينينگى نەلىكتەن ماڭىزدى؟
ونكولوگتار ءسۇت بەزى وبىرىن ەرتە كەزەڭدە انىقتاۋ ءۇشىن قازاقستاندا تولىعىمەن تەگىن جۇرگىزىلەتىن سكرينينگتىك تەكسەرۋدەن ءوتۋدى تاعى دا ەسكە سالادى.
سكرينينگ 40-70 جاس ارالىعىنداعى ايەلدەرگە بەكىتىلگەن جەردەگى ەمحانادا جۇرگىزىلەدى.
"مامموگرافيا سكرينينگى قاتەرلى ىسىك اۋرۋىن ەرتە كەزەڭدە انىقتاۋعا كومەكتەسەدى. سونىڭ ارقاسىندا قاتەرلى ىسىكتى ايەلدىڭ ءوزى اۋرۋدىڭ بەلگىلەرىن بايقاماي تۇرىپ-اق انىقتاۋعا بولادى. بۇل دەر كەزىندە جانە تيىمدىرەك ەمدەۋ مۇمكىندىگىن ارتتىرادى، سونىڭ ىشىندە اعزانى ساقتاۋ وپەراسيالارىنا مۇمكىندىك بەرەدى. ءقازىر الماتىدا "قىزعىلت قازان" ناۋقانى ءوتىپ جاتىر. بۇل – ءسۇت بەزى قاتەرلى ىسىگىنىڭ قاۋىپ-قاتەرى، وسى اۋرۋدىڭ الدىن الۋ جانە ەرتە دياگنوستيكالاۋ تۋرالى اقپاراتتاندىرۋعا باعىتتالعان ءىس-شارالار كەشەنى. ءىس-شارالار قالانىڭ بارلىق ەمحاناسىندا جانە ءبىزدىڭ الماتى ونكولوگيالىق ديسپانسەرىندە ءوتىپ جاتىر"، - دەدى دارىگەر.
الماتى ونكولوگيالىق ديسپانسەرىندە 7 قازاننان باستاپ، ءار سەنبى سايىن (7، 14، 21، 28 قازان) ءسۇت بەزى وبىرىن ەرتە انىقتاۋعا ارنالعان اشىق ەسىك كۇنى ءوتىپ جاتىر. وندا ءار ايەل ماماننان كەڭەس الا الادى جانە تەكسەرىلۋ قاجەت بولسا، تەگىن تەكسەرىلە الادى.