شەكارا اسىپ، شەتەل كورۋ كوكجيەگىڭىزدى كەڭەيتەدى. ءتىپتى، ويىڭىزدا جۇرگەن كوپتەگەن دۇنيەلەردىڭ جۇزەگە اسۋىنا دا ءوز اسەرىن تيگىزەرى حاق. ال شەتەلگە بارماس بۇرىن سول ەل تۋرالى اقپارات جيناپ العانىڭىز ارتىق بولماس. ەندەشە اlmaty-akshamy.kz تىلشىلەرى Kaz.tengritravel.kz پورتالىنا سىلتەمە جاساي وتىرىپ، الەمدەگى ەڭ تانىمال مۇراجايلار تۋرالى اقپارات بەرۋدى ءجون كوردى.
پاريجدىك لۋۆر
لۋۆرداعى كەزەكتىڭ ۇزىندىعى ءبىر شاقىرىمدى قۇرايدى – بۇل ونىڭ ماڭىزدىلىعىنىڭ ايقىن دالەلى. مۇراجاي كوللەكسياسى ەجەلگى داۋىردەن 19 عاسىردىڭ ءبىرىنشى جارتىسىنا دەيىنگى كەزەڭدە جاسالعان جۇزدەگەن مىڭ بۇيىم مەن ونەر تۋىندىلارىنان تۇرادى.
جادىگەرلەر بىرنەشە كورمەلەرگە تاقىرىپ بويىنشا بولىنگەن: ەجەلگى شىعىس، ەجەلگى مىسىر، ەجەلگى گرەكيا، ەترۋريا جانە ريم، يسلام ونەرى، مۇسىندەر، ونەر نىساندارى، بەينەلەۋ ونەرى، گرافيكالىق ونەر.
لۋۆردىڭ باستى كورىكتى جەرلەرى - لەوناردو دا ءۆينچيدىڭ "مونا ليزا" كارتيناسى، سونىمەن قاتار "ۆەنەرا دە ميلو" جانە "ساموتراكيا نيكە" مۇسىندەرى.
نيۋ-يوركتەگى مەتروپوليتەن ونەر مۇراجايى
الەمدەگى ەڭ ۇلكەن جانە ەڭ كوپ كەلەتىن ءتورتىنشى ونەر مۇراجايلارىنىڭ ءبىرى. وعان جىل سايىن 6 ميلليوننان استام ادام كەلەدى. 1870 جىلى ءۇش جەكە كارتينالار توپتاماسىنان نەگىزى قالانعان ول ۋاقىت وتە كەلە الەمدىك ونەردىڭ ناعىز قازىناسىنا اينالدى.
مەتروپوليتەن ونەر مۇراجايىندا كونتينەنتتىك جانە تاريحي كەزەڭگە بولىنگەن 17 تاقىرىپتىق ءبولىم بار. مۇراجايدى ارالار شىعۋ ءۇشىن كەم دەگەندە ءبىر كۇن قاجەت، ءبىراق ءبىر اپتادا ونىڭ بارلىق بولىمدەرىن ارالاپ شىعۋ مۇمكىن ەمەس.
ءبىر قىزىعى، 2018 جىلدان باستاپ مۇراجايعا ەركىن بارۋ قۇقىعى تەك نيۋ-يورك تۇرعىندارىن بەرىلدى، ال قالعاندارى ءۇشىن 30 دوللار كولەمىندە تولەم ەنگىزىلدى.
بريتان مۇراجايى
ۇلىبريتانيانىڭ باستى تاريحي-ارحەولوگيالىق مۇراجايى الەمدەگى ەڭ ۇلكەن مۇراجايلاردىڭ ءبىرى بولىپ سانالادى، ول 1753 جىلى قۇرىلعان. مۇراجايدا ەجەلگى گرەكيا، مەسوپوتاميا، ەجەلگى ريم، ەجەلگى مىسىر ەۋروپالىق جانە ازيالىق شەبەرلەردىڭ تۋىندىلارىن كورۋگە بولادى.
مۇراجايدىڭ توپتاماسىندا كەم دەگەندە 8 ميلليون نىسان بار جانە ادامزاتتىڭ ەكى ميلليون جىلدىق تاريحىن قامتيدى.
سانكت-پەتەربۋرگتەگى ەرميتاج
الەمدەگى ەڭ ءىرى ونەر، مادەني جانە تاريحي مۇراجايلاردىڭ ءبىرى. 1764 جىلى ەكاتەرينا IIء-نىڭ جەكە توپتاماسى رەتىندە قۇرىلعان. مۇندا رەنۋار، پيكاسسو، مونە، رافاەل، ميكەلاندجەلو، ۆەلاسكەس، رۋبەنس جانە تاعى باسقالاردىڭ تۋىندىلارى قويىلعان.
ەرميتاجدا ءۇش ميلليوننان استام ونەر تۋىندىلارى مەن الەمدىك مادەنيەت ەسكەرتكىشتەرىنىڭ جيناعى بار. ەرميتاجدىڭ باستى شەديەۆرلەرى دا ءۆينچيدىڭ "مادوننا ليتتا"، تيسياننىڭ "تاۋبە ەتۋشى مەري ماگدالەنا"، سونداي-اق رەمبراندتتىڭ "دانا" جانە انري ءماتيسستىڭ "بي" تۋىندىلارى بولىپ سانالادى.
ۆاتيكان مۇراجايلارى
مۇراجاي توپتامالارى پاپالار جاساعان جانە كلاسسيكالىق شەبەرلەردىڭ كوركەم تۋىندىلارى، سونىڭ ىشىندە قايتا ورلەۋ ءداۋىرىنىڭ تۋىندىلارى.
ۆاتيكان مۇراجايلارىندا 22 ونەر توپتامالارى بار، ولاردىڭ ەڭ تانىمالى - تاماشا كلاسسيكالىق مۇسىندەر ورنالاسقان پيۋس كلەمەنت مۇراجايى. ءبىراق، ارينە، ۆاتيكان مۇراجايلارىنىڭ باستى كورىكتى جەرلەرى - ميكەلاندجەلو سالعان سيكستين كاپەللاسى مەن رافاەلدىڭ ستانستارى.
رەيكسميۋسەۋم، امستەردام
نيدەرلاندىداعى ەڭ ۇلكەن جانە الەمگە ايگىلى ونەر مۇراجايى. رەيكسميۋسەۋم نەگىزىن قالاۋشى لۋي بوناپارت، اتى اڭىزعا اينالعان پاتشا ناپولەوننىڭ اعاسى. مۇراجاي1800 جىلى ول گااگادا قۇرىلىپ، وسىندا ورنالاسقان. ال 1808 جىلى امستەردامعا كوشىرىلدى.
رەيكسميۋسەۋم توپتاماسىندا گوللاند كەسكىندەمەسىنىڭ التىن داۋىرىندەگى سۋرەتشىلەردىڭ تۋىندىلارى سونداي-اق قولا مۇسىنشەلەر، كورەي قوراپتارى جانە باسقا زاتتار تۇرىندەگى ازيالىق ونەر تۋىندىلارىنىڭ كوللەكسياسى بار.
مۇراجايدا اۆستراليانىڭ ەۋروپالىق بولىگىنىڭ تاريحىنداعى ەڭ كونە جازبا جادىگەرلەردىڭ ءبىرى – حارتوگ تاقتاسى مەن مەدۆەيدەگى رەيد كەزىندە قولعا تۇسكەن اعىلشىن اسكەري كەمەسى دە قويىلعان.
پرادو مۇراجايى - مادريد، يسپانيا
1819 جىلى نەگىزى قالانعان مۇراجاي توپتامالارىنىڭ ساپاسى مەن الۋانتۇرلىلىگى بويىنشا الەمدەگى ەڭ ۇزدىكتەردىڭ قاتارىنان تابىلادى.
مادريدتەگى بۇل كوركەم گالەرەيادا 11-18 عاسىرلارداعى يسپان كەسكىندەمەسىنىڭ ەڭ تولىق جيناعى، سونداي-اق ەل گرەكو، ۆەلاسكەس، گوييا، بوش، تيسيان، ۆان دەيك نەمەسە رەمبراندت سياقتى الەمگە ايگىلى سۋرەتشىلەردىڭ كوپتەگەن تۋىندىلارى بار. سونداي-اق مۇندا ءسىز شىعارماشىلىقتىڭ ءارتۇرلى كەزەڭدەرىندە جاسالعان باسقا ەۋروپالىق اتاقتى سۋرەتشىلەردىڭ تۋىندىلارىن تابا الاسىز.
سەۋلدەگى كورەيانىڭ ۇلتتىق مۇراجايى
كورەيانىڭ ۇلتتىق مۇراجايى ازياداعى ەڭ كوپ باراتىن مۇراجاي دەپ اتالادى. ول 1945 جىلى نەگىزى قالانعان جانە 2005 جىلدان بەرى ەجەلگى كورەي بەكىنىسىنىڭ بەينەسىندەگى وتقا ءتوزىمدى ماتەريالداردان سالىنعان قازىرگى عيماراتىندا ورنالاسقان. مۇراجاي كورەي تاريحى مەن ونەرىنە ارنالعان جانە ەلدىڭ دامۋ تاريحىن بەينەلەيدى.
ونىڭ توپتاماسىندا 220 مىڭنان استام جادىگەر بار، ونىڭ ىشىندە كەسكىندەمە، مۇسىندەر، كالليگرافيا، مەتالل جانە قىش بۇيىمدار جانە ت.ب. جيناقتالعان.
ستوكگولمدەگى ۆاسا مۇراجايى
ۆاسا مۇراجايى وسى اتتاس Vasa كەمەسىنە ارنالعان. بۇل 17 عاسىردان بۇگىنگى كۇنگە دەيىن ساقتالعان كەمەنى كورسەتەتىن جالعىز مۇراجاي. سونداي-اق، مۇندا اعاش مۇسىندەر، جەكە زاتتار، تۇرمىستىق زاتتار، مىلتىقتاردى كورۋگە بولادى.
ەسكەرتۋ: ۆاسا - 1625 جىلى جاسالعان اسكەري كەمە. كەمە تاريحى 1625 جىلى 16 قاڭتاردا شۆەسيا كورولى گۋستاۆ II ادولف گوللانديالىق كەمە جاساۋشى حەنريك حۋبەرسسونمەن جاڭا اسكەري كەمە جاساۋ تۋرالى كەلىسىم-شارتقا وتىرعان كەزدە باستالدى. بۇل شۆەد فلوتىنىڭ ەڭ ماڭىزدى نىسانى بولۋى كەرەك ەدى. ءبىراق ولاي بولمادى، كەمە سۋعا شىققان العاشقى ساپارىندا- اق باتىپ كەتتى.
ۋففيسي گالەرەياسى، فلورەنسيا، يتاليا
الەمدەگى ەڭ كوپ باراتىن ونەر مۇراجايلارىنىڭ ءبىرى. مۇندا بىرەگەي ونەر تۋىندىلارى جيناقتالعان: ورتا عاسىرلاردان بۇگىنگى كۇنگە دەيىنگى سۋرەتشىلەردىڭ تۋىندىلارى، تاماشا ساقتالعان انتيكۆارلىق مۇسىندەر، گوبەلەندەر جانە مينياتيۋرالار. ۋففيسي گالەرەياسىنىڭ توپتامالارى ەۋروپاداعى ەڭ كونە جيناقتاردىڭ ءبىرى بولىپ سانالادى.
باستى كورمەدەگى تۋىندىلاردىڭ ىشىندە ءىرى شەبەرلەردىڭ جۇمىستارى بار:
- دجوتتو؛
- ميكەلاندجەلو؛
- رافاەللو؛
- لەوناردو دا ۆينچي؛
- بوتيچەللي؛
- تيسيان.