وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ باسشىسى سانجار الين اتقارىلعان جۇمىستار تۋرالى ەسەپ بەردى، دەپ حابارلايدى اlmaty-akshamy.kz.
باسقارما بۇگىندە 77 جوبانى ىسكە اسىرۋدا، ونىڭ 41ء-ى قۇرىلىس ساتىسىندا، ال 36-سى جوبالانۋدا. سانجار الين اتاپ وتكەندەي، مەگاپوليس تۇرعىندارىن ساپالى سۋ قۇبىرى جانە كارىز جەلىلەرىمەن قامتاماسىز ەتۋ ءۇشىن باسقارمامەن الاتاۋ، جەتىسۋ، مەدەۋ، ناۋرىزباي جانە تۇركسىب اۋداندارىندا 27 جوبا بويىنشا جۇمىستار جۇرگىزۋدە. جەلىلەردىڭ ۇزىندىعى 690،2 شاقىرىم. سپيكەر 11 جوبا بيىل (جەلىلەردىڭ ۇزىندىعى 272،2 كم)، قالعان 16 جوبا (جەلىلەردىڭ ۇزىندىعى 418 شاقىرىم) 2023-2024 جىلدارى اياقتالاتىنىن قوسىپ ايتتى.
«2020 جىلى ناۋرىزباي اۋدانىنداعى قارعالى، قاراعايلى، قۇرامىس، تاۋسامالى شاعىن اۋداندارىنىڭ تۇرعىندارىن سۋمەن قامتاماسىز ەتۋ ءۇشىن 50 مىڭ تۇرعىندى سۋمەن قامتاماسىز ەتەتىن «قارعالى» سۋ تارتۋ قۇرىلىسى سالىنا باستالدى. سونداي-اق، بيىل اقجار، تاستىبۇلاق، شۇعىلا، تاۋسامالى شاعىن اۋداندارى، جاڭاتۇرمىس جانە قىرعاۋىلدى شاعىن اۋداندارىنىڭ 100 مىڭ تۇرعىنىن سۋمەن جابدىقتايتىن وسىعان ۇقساس قۇرىلىستى اقساي وزەنىندە باستاۋ جوسپارلانۋدا»، - دەپ حابارلادى س. الين.
سونداي-اق، باسقارما سۋمەن جابدىقتاۋ جانە سۋ بۇرۋ جەلىلەرىمەن قامتاماسىز ەتەتىن 25 وبەكت جوباسىن ازىرلەۋدە.