الماتى قالاسىنىڭ مادەنيەت باسقارماسى مەگاپوليس تۇرعىندارى مەن قوناقتارىنا قالا كۇنىن اتاپ ءوتۋ اياسىندا ءتۇرلى مەرەكەلىك باعدارلاما ازىرلەپ قويدى، سونىڭ ىشىندە ەرەكشە اتاپ وتۋگە تۇرارلىعى «سۇيەمىن سەنى، الماتى» دەگەن سيمۆوليكالىق اتاۋى بار street festival.
جۇرەگى الماتى دەپ سوققان كىمنىڭ بولسىن قالا تاريحىنان حابارى بولماۋى مۇمكىن ەمەس. شاھاردىڭ وزىنە ءتان اتموسفەراسى، قالىپتاسۋ جولى بار. قىزىق اڭىزدارى دا جەتەرلىك. سوندىقتان دا فەستيۆالدىڭ نەگىزى قالا تاريحىنا ورىلگەن. 1940-جىلداردان باستاپ بۇگىنگە دەيىن بولعان جارقىن وقيعالار، كەيىپكەرلەر ادەمى كورمە، قويىلىمدار ارقىلى بەرىلەدى.
تۇرعىندار مەن قالا قوناقتارىن ەرەكشە كوڭىل-كۇيگە بولەۋ ءۇشىن كونسەرتتەر مەن بي الاڭدارى دا ۇيىمداستىرىلعان.
اباي اتىنداعى قازاق ۇلتتىق وپەرا جانە بالەت تەاترىنان باستالىپ، پانفيلوۆ كوشەسىن بويلاي ۇيىمداستىرىلعان ونەر بازارى اباي الاڭىندا دا جالعاستى. مۇندا قازاق ءۆالسىنىڭ اتاسى ءشامشى قالداياقوۆتىڭ تۋىندىلارى شىرقالىپ، ءداستۇرلى اندەر ورىندالدى.
سوناۋ 1969-جىلى تۇساۋى كەسىلگەن «تاقيالى پەرىشتە» فيلمىنە ارنالعان بۇرىش تا كوپتىڭ نازارىنا ەرەكشە ءىلىندى. جۇرت سۋرەتكە ءتۇسىپ، سول كەزدەردى ەسكە الىپ جاتىر. مۇندا ءفيلمدى ەسكە سالاتىن ءتۇرلى رەكۆيزيتتەر بار. ءتىپتى تايلاقتىڭ ءوزى وسىندا.
كوشە سۋرەتشىلەرى مەن ارت-بازارلارعا ارنالىپ شاتىرلار دا تىگىلگەن. ال بالالارعا بازارلىق رەتىندە «الدار كوسە» قويىلىمى ساحنالاندى.