قالادا سۋ تاسقىنى جاعدايىنا قاتتى جاۋىن-شاشىن تۋرالى داۋىلدى ەسكەرتۋدەن كەيىن ازاماتتىق قورعاۋ كۇشتەرى اياقتان تىك تۇرعىزىلدى، دەپ حابارلايدى Almaty-akshamy.kz.
ساعات 10:30-داعى جاعداي بويىنشا الماتىدا "112" جەلىسى مەن "109" قۇتقارۋ قىزمەتىنە ءۇي اۋلاسى مەن كوشەلەردى سۋ باسۋعا بايلانىستى 11 حابارلاما كەلىپ ءتۇستى.
وقيعا ورنىنا تج باسقارماسىنىڭ جاۋاپتى ينسپەكتورلارى باردى، سۋ باسقانى جونىندەگى جەتى حابارلاما راستالمادى.
جەتىسۋ اۋدانىندا گونچاروۆ كوشەسىندە تجد قىزمەتكەرلەرى بىتەلىپ قالعان ارىق قۇبىرىن تازالادى.
الاتاۋ اۋدانىنداعى ماگادانسكايا كوشەسىندەگى مەردىگەرلىك ۇيىمنىڭ كۇشىمەن ارىق جەلىسى تازارتىلدى.
ناۋرىزباي اۋدانىندا سۇرانشى باتىر كوشەسىندە جەكە ءۇيدىڭ اۋلاسىن سۋ باسىپ، وقيعا ورنىندا اكىمدىككە قاراستى مەردىگەرلىك ۇيىمىنىڭ قىزمەتكەرلەرى جۇمىس ىستەدى.
تۇسكە دەيىن سۋ باسۋ بويىنشا بارلىق راستالعان جاعدايلار بويىنشا جۇرگىزىلگەن جۇمىستار اياقتالدى.
27 ناۋرىزدا كەشكى ساعات 21:00-دەن تاڭعى 09:00-گە دەيىن الماتىدا 23 مم جاۋىن-شاشىن ءتۇستى. ايدىڭ باسىنان بەرى تۇسكەن جاۋىن-شاشىننىڭ كولەمى - 146،1 مم، ال ايلىق قالىپتى نورما 76 مم بولادى.
"قازسەلدەنقورعاۋ" مم باقىلاۋ بەكەتتەرىنىڭ دەرەكتەرى بويىنشا، كىشى جانە ۇلكەن الماتى، اقساي، قارعالى وزەندەرىنىڭ باسسەيندەرىندە جاعداي تۇراقتى. سۋ دەڭگەيىنىڭ كوتەرىلۋى بايقالمايدى.