الماتى قالاسىندا جاۋىن-شاشىن سالدارىنان سۋ باسۋدىڭ الدىن الۋ ماقساتىندا ءال-فارابي داڭعىلىنداعى جەراستى جاياۋ جۇرگىنشىلەر وتكەلىندە سۋ بۇرۋ جەلىلەرىن سالۋ جوسپارلانىپ وتىر. بۇل تۋرالى الماتى ءماسليحاتىنىڭ XXII سەسسياسى بارىسىندا قالالىق ەكولوگيا جانە قورشاعان ورتا باسقارماسى باسشىسىنىڭ مىندەتىن اتقارۋشى ميراس گايسين مالىمدەدى، دەپ حابارلايدى aqshamnews.kz
سپيكەردىڭ ايتۋىنشا، جوبا اياسىندا ءال-فارابي داڭعىلىنىڭ وڭتۇستىگىندە، كەرەڭقۇلاق پەن ەسەنتاي وزەندەرىنىڭ اراسىنداعى اۋماق قامتىلادى. جوبادا سۋدىڭ ۇلكەن كولەمىن ەسكەرە وتىرىپ، ارىق جەلىلەرىن رەكونسترۋكسيالاۋ، سۋ اعىزعىش ورناتۋ، ويىقتاردى قايتا قۇرۋ جانە قولدانىستاعى سۋ بۇرۋ جەلىلەرىن كەڭەيتۋ جوسپارلانعان.
قازىرگى ۋاقىتتا باسقارما تەحنيكالىق تاپسىرما دايىندادى، ال جوبالاۋ-سمەتالىق قۇجاتتامانى ازىرلەۋ وسى جىلى باستالادى دەپ جوسپارلانىپ وتىر.
سونىمەن قاتار، الاتاۋ اۋدانىنىڭ «توميريس» شاعىن اۋدانىنداعى دجيگيتوۆكا وزەنى توعانىنىڭ گيدروتەحنيكالىق قۇرىلىستارىن قايتا جاڭارتۋ ماسەلەسى دە قوزعالدى.
«جالپى، قالا اۋماعىندا 40 گيدروتەحنيكالىق قۇرىلىس بار، ونىڭ 6-ى الاتاۋ اۋدانىندا ورنالاسقان جانە ولاردىڭ جاعدايى ءماز ەمەس. توعاندار كاسكادى 1960 جىلدارى سالىنعان، سودان بەرى جوندەۋ جۇمىستارى جۇرگىزىلمەگەن. جاۋىن-شاشىننىڭ كوپ بولۋى جاعدايىندا گيدروتەحنيكالىق قۇرىلىستاردى شايىپ كەتۋ ءقاۋپى بار»، - دەدى ميراس گايسين.
بۇل ماسەلەلەردى شەشۋ ءۇشىن باسقارما 2024 جىلدىڭ 4-توقسانىندا گيدروتەحنيكالىق قۇرىلىستاردى جاڭارتۋعا جوبالاۋ-سمەتالىق قۇجاتتامانى ازىرلەۋدى جوسپارلاپ وتىر. جوبادا توزعان گيدروتەحنيكالىق قۇرىلىستار مەن كوتەرگىش گيدرومەحانيكالىق جابدىقتاردى رەكونسترۋكسيالاۋ، تىرەك قۇرىلىستارىن سالۋ، زاڭسىز قۇرىلىستاردى بۇزۋ، توعانداردى تازالاۋ جانە جاعالاۋدى نىعايتۋ، تازارتۋ قۇرىلىستارىن ورناتۋ جانە جاسىل قوردى جاڭارتۋ جوسپارلانعان.