الماتىدا جاڭا قاۋىمداستىق-ورتالىقتار شىعارماشىلىق، ەرىكتىلىك، وقىتۋ جانە مانساپتىق ءوسۋ ءۇشىن كەڭىستىككە اينالۋدا. بۇل تۋرالى الماتى قالاسىنىڭ جاستار ساياساتىن دامىتۋ مەملەكەتتىك قورى ديرەكتورىنىڭ مىندەتىن اتقارۋشى باعدات اناربايەۆا وڭىرلىك كوممۋنيكاسيالار قىزمەتى مەن قالالىق جاستار ساياساتى باسقارماسى ۇيىمداستىرعان باسپا ءسوز تۋرى بارىسىندا حابارلادى.
ونىڭ ايتۋىنشا، قاۋىمداستىق ورتالىقتار بازاسىندا كەڭەس بەرۋ ايماقتارى، جوبالىق كەڭسەلەر مەن بەلسەندى جاستاردىڭ كەزدەسۋلەرىنە ارنالعان كابينەتتەر قۇرىلدى. ورتالىقتار open space فورماتىندا ساعات 10.00-دەن 19.00-گە دەيىن، كەيدە ءتىپتى 23.00-گە دەيىن جۇمىس ىستەيدى.
«ءبىزدىڭ قاۋىمداستىق-ورتالىقتار - بۇل جاي عانا كەزدەسۋگە ارنالعان ورىن ەمەس، ولار وسۋگە جانە قولداۋعا ارنالعان الاڭ. مۇندا جۇمىسقا ورنالاسۋ، قارجىلىق ساۋاتتىلىق، تىلدەردى ۇيرەنۋ بويىنشا كەڭەستەر الۋعا، سونداي-اق پسيحولوگتار مەن زاڭگەرلەردىڭ قىزمەتتەرىن پايدالانۋعا بولاد»، - دەپ اتاپ ءوتتى ول.
باعدات اناربايەۆا نەگىزگى ەرەكشەلىكتەردىڭ ءبىرى قالانىڭ 30-دان استام ءىرى ۆولونتەرلىك ۇيىمدارىن بىرىكتىرەتىن ۆولونتەرلىك ورتالىق بولىپ تابىلاتىنىن قوستى. ءدال وسى جەردە گۋمانيتارلىق جيىندار ۇيلەستىرىلىپ، الەۋمەتتىك جوبالار ۇيىمداستىرىلادى.
سونداي-اق، ورتالىقتاردا زاماناۋي باعىتتار بويىنشا ونەر مەكتەپتەرى مەن كۋرستار اشىلدى. سوڭعى باستامالاردىڭ ءبىرى اي سايىن وتكىزىلەتىن جاساندى ينتەللەكت بويىنشا كۋرستار بولدى.
«ءبىز جاستاردىڭ IT جانە تەحنولوگيا سالاسىنا دەگەن ۇلكەن قىزىعۋشىلىعىن كورىپ وتىرمىز. تەك سوڭعى ايلاردا عانا كۋرستارعا 200-دەن استام ادام جازىلدى. باعدارلاما سيفرلاندىرۋ مينيسترلىگىمەن جانە جەتەكشى ساراپشىلارمەن بىرلەسىپ ازىرلەندى»، - دەدى باعدات اناربايەۆا.
بۇدان باسقا، ورتالىقتار شىعارماشىل جاستارعا قولداۋ كورسەتەدى: دىبىس جازۋ ستۋديالارى جۇمىس ىستەيدى، ۆوكال، بەينە كونتەنت جانە پودكاست ءتۇسىرۋ بويىنشا تەگىن ساباقتار ۇيىمداستىرىلادى.
«ءبىز الماتى جاستارىنىڭ دامۋى ءۇشىن بارلىق جاعدايدى جاساۋعا تىرىسامىز. سوندىقتان جاستار ورتالىقتارىن جاڭعىرتۋ ءبىزدىڭ باستى باسىمدىقتارىمىزدىڭ ءبىرى بولىپ قالا بەرەدى»، - دەپ باسا ايتتى ول.
ەستەرىڭىزگە سالا كەتەيىك، 2023 جىلى قالا اكىمى ەربولات دوسايەۆتىڭ باستاماسىمەن سەگىز جاڭا ورتالىق اشىلدى، ال 2025 جىلى ولاردىڭ سانىن 16-عا دەيىن ارتتىرۋ جوسپارلانۋدا. بۇل ورتالىقتار جۇمىسپەن قامتۋ بويىنشا كەڭەس بەرۋ مەن قارجىلىق ساۋاتتىلىقتان باستاپ تىلدىك كۋرستارعا، پسيحولوگيالىق جانە زاڭگەرلىك كومەككە دەيىن كوپتەگەن قىزمەتتەردى ۇسىنادى.