الماتىدا ستۋدەنتتەر دالادا قونىپ ءجۇر دەگەن اقپارات شىندىققا جاناسپايدى – مينيسترلىك

ورىن جەتپەگەن ستۋدەنتتەر حوستەلدەر مەن قوناقۇيلەرگە ورنالاستىرىلادى

عىلىم جانە جوعارى ءبىلىم مينيسترلىگى جەلىدە تاراعان الماتىداعى ستۋدەنتتەر دالادا قونىپ ءجۇر دەگەن اقپارات شىندىققا جاناسپايتىنىن مالىمدەدى، دەپ حابارلايدى Almaty-akshamy.kz.

«الماتىداعى ستۋدەنتتەر دالادا قونىپ ءجۇر» دەگەن سارىنداعى حابارلامالار سوڭعى كۇندەرى ءبىرقاتار اقپاراتتىق سايت پەن الەۋمەتتىك جەلىدە تاراعان ەدى. مينيسترلىك ولاردى مۇقيات زەردەلەپ، كوپشىلىگى ءبىر پاراقشادان الىنعانىن جانە ونداعى مالىمەتتىڭ راستالماعانىن حابارلايدى. 

ب ا ق وكىلدەرى مەن الەۋمەتتىك جەلىدەگى پاراقشا يەلەرى مينيسترلىكتىڭ باسپا ءسوز قىزمەتىنە ول ستۋدەنتتەر جايلى ناقتى دەرەكتەردى ۇسىنا المادى. وسىعان وراي قوعام وكىلدەرى مەن بۇقارالىق اقپارات قۇرالدارىن تەك رەسمي اقپاراتقا سەنۋگە شاقىرامىز. 

ستۋدەنتتەردىڭ جاتاقحاناعا ورنالاسۋىنا قاتىستى سۇراقتار تۋىنداسا جوعارى وقۋ ورىندارىنىڭ اكىمشىلىگىنە حابارلاسۋدى سۇرايمىز. ال، ۋنيۆەرسيتەتتەر شاكىرتتەردى جاتاقحاناداعى ورىندارمەن قامتاماسىز ەتۋدە. 

سونداي-اق، قاجەت بولعان جاعدايدا ورىن جەتپەگەن ستۋدەنتتەر حوستەلدەر مەن قوناقۇيلەرگە ورنالاستىرىلادى. ايتا كەتۋ كەرەك، عىلىم جانە جوعارى ءبىلىم ۆيسە-مينيسترى قۋانىش ەرعالييەۆ ستۋدەنتتەردى جاتاقحانامەن قامتۋ ماسەلەسى تولىق شەشىلگەنشە الماتىدا بولادى. ول جاعدايدى تىكەلەي باقىلاۋىندا ۇستايدى»، - دەلىنگەن مينيسترلىك حابارلاماسىندا.