الماتىدا بەينەباقىلاۋ كامەراسىن سىندىرعان سوتتالعانعا ۇكىم شىقتى.
الماتىداعى تەرگەۋ يزولياتورىندا بەينەباقىلاۋ كامەراسىن قاساقانا سىندىرعان سوتتالعانعا قاتىستى قىلمىستىق كودەكسكە ەنگىزىلگەن جاڭا باپ بويىنشا ۇكىم شىقتى، دەپ حابارلايدى aqshamnews.kz Polisia.kz-كە سىلتەمە جاساپ.
الماتى قالاسى بويىنشا قاجد №72 مەكەمەسىندە وتىرعان 21 جاستاعى م. قىلمىستىق كودەكستىڭ 191-بابى بويىنشا سوتتالعان بولاتىن. وسى جىلدىڭ ماۋسىم ايىندا م. جازاسىن وتەيتىن كامەرادا بەينەباقىلاۋدىڭ ىستەن شىققانى انىقتالىپ، وقيعا ورنىنا الماتى قالاسى تۇركسىب اۋداندىق پوليسيا باسقارماسىنان جەدەل تەرگەۋ توبى شاقىرىلعان ەدى. تەكسەرىس بارىسىندا بەينەباقىلاۋ كامەراسىن سوتتالعان م. سىندىرعانى انىقتالدى.
بۇعان دەيىن پرەزيدەنتتىڭ تاپسىرماسى بويىنشا پەنيتەنسيارلىق مەكەمەلەردە بەينەكامەرالاردى بۇلدىرگەنى ءۇشىن قىلمىستىق جاۋاپكەرشىلىك ەنگىزىلگەن بولاتىن. جاڭا باپ بويىنشا التى ايدان جەتى جىلعا دەيىن باس بوستاندىعىنان ايىرۋ جازاسى قاراستىرىلعان. جۋىردا قىلمىستىق-اتقارۋ جۇيەسى دەپارتامەنتىنىڭ تالاپ ارىزى بويىنشا سوت بولىپ، بۇرىن ادام توناعانى ءۇشىن 3 جىلعا سوتتالعان م. ەندى بەينەباقىلاۋ كامەرەسىن قاساقانا سىندىرعانى ءۇشىن بۇرىنعى جازاسىنا تاعى 1 جىل قوسىپ الدى.