ءبىزدىڭ ەلىمىزدە شاحمات ويىنىنا ەرەكشە كوڭىل بولىنەدى.
بۇگىندە شاحمات ويىنىنان حالىقارالىق جارىستاردا توپ جارىپ جۇرگەن قازاقستاندىقتار ماقتانىشىمىزعا اينالۋدا، دەپ حابارلايدى aqshamnews.kz Polisia.kz-كە سىلتەمە جاساپ.
شاحمات ويىنى ادامدى جىلدام ويلانۋعا، جىلدام شەشىم قابىلداۋعا تاربيەلەپ قانا قويمايدى، ادامنىڭ بويىنداعى ەرىك-جىگەر مەن مورالدىق قاسيەتتەردى ارتتىرۋعا ىقپال ەتەدى. ال مۇنداي قاسيەتتەر تاعدىر جولىندا اياعىن شالىس باسىپ، تەمىر توردا جۇرگەندەر ءۇشىن دە پايدالى بولاتىنى ءسوزسىز.
الماتى قالاسى بويىنشا قاجد-عا قاراستى №72 مەكەمەسىندە دە سوتتالعاندارعا شاحمات ويىنىن ۇيرەتۋ جۇيەلى تۇردە قولعا الىنۋدا. وسى ورايدا جۋىردا اتالعان مەكەمە باسشىلىعى الماتى قالاسى سپورت باسقارماسىنىڭ قولداۋىمەن تەرگەۋ يزولياتورىنا اسىلحان كارايەۆ جانە ساۋمين سۋحانوۆ سياقتى شاحمات جاتتىقتىرۋشىلارىن ارنايى شاقىرىپ، جازالارىن شارۋاشىلىق قىزمەتىندەگى جاساقتا وتەپ جۇرگەن سوتتالعاندار اراسىندا شەبەرلىك ساباعىن وتكىزدى.
بۇل يگىلىكتى ءىس الداعى ۋاقىتتا دا جالعاسىن تاباتىن بولادى. سوتتالعاندار اراسىندا شاحمات ويىنىن دامىتۋعا ق ر ۇكىمەتىنىڭ “قازاقستان رەسپۋبليكاسىندا شاحماتتى دامىتۋدىڭ 2023-2027 جىلدارعا ارنالعان كەشەندى جوسپارىن بەكىتۋ تۋرالى” قاۋلىسى دا وڭ ىقپال ەتۋدە.