سوت جۇيەسى تيىمدىلىگىنىڭ ماڭىزدى كريتەرييلەرىنىڭ ءبىرى سوت شەشىمدەرىنىڭ ورىندالۋى بولىپ تابىلادى. الماتىلىق سوت ورىنداۋشىلارى قيسىندى جانە تەك زاڭ اياسىندا ارەكەت ەتەدى.
الماتى قالاسى ادىلەت دەپارتامەنتى باسشىسىنىڭ ورىنباسارى جاڭاباي اعمانوۆ وڭىرلىك كوممۋنيكاسيالار قىزمەتىنىڭ بريفينگىندە جۇمىس ەرەكشەلىگى، بورىشتى ءوندىرىپ الۋ جانە ءوندىرىپ الۋشىلاردىڭ مۇددەلەرىن قالپىنا كەلتىرۋ تۋرالى تولىق ايتىپ بەردى، دەپ حابارلايدى Almaty-akshamy.kz.
ادەتتە، سوت ورىنداۋشىلار سوت شەشىمدەرىمەن جانە باسقا دا اتقارۋشىلىق قۇجاتتارمەن جۇمىس ىستەيدى. الگوريتم كەلەسىدەي: سوت ورىنداۋشىسى سوتتان، پوليسيادان جانە باسقا دا ورگانداردان قۇجاتتارمەن اتقارۋشىلىق ءىس جۇرگىزۋدى قوزعاۋ تۋرالى ارىزدى الادى. اتقارۋشىلىق ءىس جۇرگىزۋ باستالادى، بورىشكەرگە ءوز ەركىمەن ورىنداۋ مەرزىمى بەرىلەدى. ەگەر ول قۇجات تالاپتارىن ورىنداماسا، ماماندار ورىنداۋعا كىرىسەدى.
سوت ورىنداۋشىلارىنىڭ جۇمىسى «اتقارۋشىلىق ءىس جۇرگىزۋ جانە سوت ورىنداۋشىلارىنىڭ مارتەبەسى تۋرالى» زاڭىمەن رەتتەلەدى، وندا ولاردىڭ قۇقىقتارى مەن مىندەتتەرى، سونداي-اق ءتارتىبى كورسەتىلگەن.
جاڭاباي اعمانوۆ اتقارۋشىلىق ارەكەتتەر جاسالعان جەردە سوت ورىنداۋشىسى اۋديو -، فوتو -، بەينەتىركەۋدى پايدالانا الاتىندىعىن حابارلادى. كەيىننەن الىنعان ماتەريال اتقارۋشىلىق ءىس جۇرگىزۋگە قوسا تىركەلەدى.
«شىعارۋعا، ورنالاستىرۋعا، بۇزۋعا بايلانىستى اتقارۋشىلىق قۇجاتتاردى ورىنداۋ كەزىندە، سونداي-اق مۇلىكتى تىزىمدەۋ جانە الىپ قويۋ كەزىندە فوتو -، بەينەتۇسىرىلىم جۇرگىزۋ ماڭىزدى. زاڭدا سوت ورىنداۋشىسى بورىشكەرلەرمەن جۇمىستى تىركەۋگە مىندەتتى بولاتىن ناقتى جاعدايلار ايقىندالعان. بۇل رەتتە سوت ورىنداۋشىسى بورىشكەرگە ءتۇسىرىلىم جۇرگىزىلىپ جاتقانىن حابارلايدى»، - دەدى سپيكەر.
ادىلەت دەپارتامەنتى باسشىسىنىڭ ورىنباسارى مۇنداي بەكىتۋ، ادەتتە، بورىشكەرلەردى ۇستاپ تۇراتىنىن جانە ولاردىڭ قۇقىققا قارسى ىس-ارەكەتتەر جاساۋىنا كەدەرگى كەلتىرەتىنىن نە وسىنداي ىس-ارەكەتتەردىڭ دالەلى بولىپ تابىلاتىنىن اتاپ ءوتتى.
كوبىنەسە سوت ورىنداۋشىلارى ءوز جۇمىسىندا اۋىر پسيحولوگيالىق قيىندىقتارعا تاپ بولادى. ادامدار مامانداردىڭ جۇمىسىنا كەدەرگى كەلتىرەدى. سوندىقتان سوت ورىنداۋشىلارىنىڭ قاتارىندا جۇمىس تاجىريبەسى مەن كۇيزەلىسكە ءتوزىمدى قۇقىق قورعاۋ ورگاندارىنىڭ بۇرىنعى قىزمەتكەرلەرى از ەمەس. سونداي-اق، پسيحولوگ سوت ورىنداۋشىلارىمەن جۇمىس ىستەيدى. ال ولار ءۇشىن كاسىبي ار-نامىس كودەكسىن ءبىلۋ مىندەتتى بولىپ تابىلادى.
جۋرناليستەردىڭ سۇراقتارىنا جاۋاپ بەرە وتىرىپ، جاڭاباي اعمانوۆ جۇمىسقا كەدەرگى كەلتىرەتىن جانە ۇيگە كىرگىزبەيتىن بورىشكەرلەر زاڭدى وكىمگە باعىنباعانى ءۇشىن اكىمشىلىك كودەكستىڭ 667-بابى بويىنشا اكىمشىلىك جاۋاپكەرشىلىككە تارتىلۋى مۇمكىن ەكەنىن، بۇل 30-دان 50 اەك-كە دەيىنگى مولشەردە ايىپپۇل سالۋعا نە 15 تاۋلىككە دەيىنگى مەرزىمگە اكىمشىلىك قاماۋعا اكەپ سوعاتىنىن ايتتى.
بۇدان باسقا، اكىمشىلىك كودەكستىڭ 670-بابىندا سوت ورىنداۋشىسىنىڭ قاۋلىلارى مەن زاڭدى تالاپتارىن ورىنداماعانى ءۇشىن جەكە تۇلعالارعا – 10، لاۋازىمدى ادامدارعا – 15، زاڭدى تۇلعالارعا-20 ايلىق ەسەپتىك كورسەتكىش مولشەرىندە ايىپپۇل كوزدەلگەن.
بورىشكەرلەر سوت شەشىمدەرىن مۇلدەم ورىندامايتىن كەزدەر بولادى، مۇنداي جاعدايلاردا ولار جىلجىمالى، جىلجىمايتىن مۇلىكتەن ايىرىلۋى مۇمكىن.
كوبىنەسە اليمەنت بويىنشا بورىشكەرلەر سوت ورىنداۋشىلارىنىڭ نازارىنا تۇسەدى. بۇل جۇمىسقا مەدياتور قوسىلادى.