الماتىدا «سوڭعى مەكەن» اتتى كورمە وتۋدە

كورمە الداعى ءبىر ايعا دەيىن جالعاسادى

الماتىدا بەلگىلى سۋرەتشى سەرگەي كالمىكوۆتىڭ جەرلەنگەن جەرى تابىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

بۇگىنگە دەيىن ونىڭ ءومىرى تۋرالى دەرەكتەر دۇرىس زەرتتەلمەي كەلگەن ەدى. دۇنيەدەن وتكەننەن كەيىن دە ءقابىرىنىڭ قايدا ەكەنى بەلگىسىز بولعان كورىنەدى. ونەرتانۋشىلار مەن ساراپشى مامانداردىڭ اتسالىسۋىمەن ول انىقتالىپ، مۇراعات تىزىمىنە قوسىلدى. مەسەناتتار بەيىت باسىن رەتكە كەلتىرۋگە قولۇشىن بەرگەن. وسىعان وراي بۇگىن ءابىلحان قاستەيەۆ اتىنداعى مەملەكەتتىك مۋزەيدە سۋرەتشىنىڭ كورمەسى ۇيىمداستىرىلدى. «سوڭعى مەكەن» دەپ اتالعان جوبا اياسىندا ونىڭ 80-گە جۋىق تۋىندىلارى قويىلعان. كورمە الداعى ءبىر ايعا دەيىن جالعاسادى.  

«ول قۇپياسى كوپ سۋرەتكەر. قاي شىعارماسى بولماسىن كوپشىلىك تۇسىنە بەرمەيتىن، شەشۋى قيىن ونەر تۋىندىلارى ەدى. بۇگىندە كالمىكوۆ ورىس اۆانگارد ونەرىنىڭ ايتۋلى وكىلدەرىنىڭ ءبىرى رەتىندە سانالادى. ءبىزدىڭ مۋزەيدە سەرگەي كالمىكوۆتىڭ تۋىندىلارى 1967 جىلىدان بەرى ساقتالىپ كەلەدى. سۋرەتشى شىعارمالارىنىڭ باسقالاردان ەرەكشەلىگى – باياۋ قانىقتىعى»، – دەدى  ق ر ەڭبەك سىڭىرگەن قايراتكەرى ەكاتەرينا رەزنيكوۆا.

سۋرەتشى 20 عاسىر باسىندا ورىنبوردان الماتىعا كوشىپ كەلگەن. ونىڭ شىعارماشىلىق جولى وسى الىپ شاھاردا ءوتتى. سەرگەي كالمىكوۆ 1500 استام كارتينالاردىڭ، يليۋستارسيالاردىڭ، تەاتر دەكاراسيالارى مەن ادەبي جازبالاردىڭ اۆتورى.