الماتى قالاسىنىڭ مەدەۋ اۋدانىنا قاراستى الاتاۋ شاعىن اۋدانىندا جالپى اۋدانى 0،8 گەكتار بولاتىن جاڭا سكۆەر سالىندى، دەپ حابارلايدى aqshamnews.kz
بۇرىن يبراگيموۆ كوشەسىندە قاراۋسىز قالعان ۋچاسكەدە ەندى جاڭا قوعامدىق كەڭىستىك قۇرىلدى. جوبا اياسىندا كەشەندى جۇمىستار اتقارىلدى: جاڭا ويىن جانە سپورت الاڭدارى، سكەيت الاڭى جاسالدى. دەمالىس ايماعىندا دۇرىس دەمالۋ ءۇشىن بەسەدكالار مەن ورىندىقتار ورناتىلدى.
جالپى اۋدانى 0،6 گەكتار اۋماقتى كوگالداندىرۋعا ەرەكشە نازار اۋدارىلدى: ءارتۇرلى اعاشتار مەن گۇلدەر وتىرعىزىلدى. جاسىل كورىنىستى ساقتاۋ جانە وسىمدىكتەرگە كۇتىم جاساۋ ءۇشىن اۆتوماتتى سۋارۋ جۇيەسى قاراستىرىلدى.
سكۆەر اۋماعىندا قاۋىپسىزدىكتى قامتاماسىز ەتۋ ماقساتىندا سۋمەن جابدىقتاۋ جەلىلەرى مەن سىرتقى جارىقتاندىرۋ جۇرگىزىلدى، سونداي-اق ينفراقۇرىلىم نىساندارىنا قىزمەت كورسەتۋگە ارنالعان تەحنيكالىق ءۇي-جاي قاراستىرىلعان.
ايتا كەتەرلىگى، الاتاۋ شاعىن اۋدانى الماتى قالاسىنان 25 كم قاشىقتىقتا ورنالاسقان. اۋدان 1957 جىلى قۇرىلعان. بۇرىن الاتاۋ ەلدى مەكەنى الماتى وبلىسىنىڭ قۇرامىنا كىرىپ، كەيىن شامامەن 30 جىل بۇرىن الماتىنىڭ مەدەۋ اۋدانىنا قوسىلىپ، «شاعىن اۋدان» مارتەبەسىن العان.
بۇگىندە تۇرعىن الابى ءوسىپ، دامىپ كەلەدى. بيىل تۇرعىندار ءۇشىن جالپى اۋدانى 7،3 مىڭ شارشى مەتر، قۋاتى اۋىسىمىنا 149 ادامدى قابىلداي الاتىن دەنەشىنىقتىرۋ-ساۋىقتىرۋ كەشەنى پايدالانۋعا بەرىلدى.
الماتى اكىمى ەربولات دوسايەۆتىڭ تاپسىرماسىمەن 2025 جىلى سۋمەن جابدىقتاۋ جانە سۋ بۇرۋ جەلىلەرىنىڭ قۇرىلىسى باستالادى. سونىمەن قاتار، كەلەسى جىلى «الاتاۋ» مەملەكەتتىك اۋرۋحاناسىنىڭ عيماراتىن قايتا جاڭارتۋ جوسپارلانعان. سونداي-اق، مادەنيەت ءۇيىن قايتا قۇرۋ بويىنشا 2 جىلعا ارنالعان جوبا ىسكە قوسىلادى. جوبا اياسىندا جەرگىلىكتى تۇرعىندار ءۇشىن كوميۋنيتي ورتالىعىن ورنالاستىرۋ قاراستىرىلعان.