الماتى قالاسىندا سينتەتيكالىق ەسىرتكى ءوندىرىسى بويىنشا اسا ءىرى كولەمدەگى قىلمىستىق ىستەر بويىنشا ۇكىمدەر كۇشىنە ەندى، دەپ حابارلايدى Almaty-akshamy.kz Polisia.kz-كە سىلتەمە جاساپ.
ءبىرىنشى ۇكىم مەفەدرون ءوندىرىسىن ەسىرتكى وتكىزۋ ماقساتىندا ۇيىمداستىرعان 24 جاستاعى ح. يسلاموۆ جانە 25 جاستاعى س. ەپيفانوۆ دەگەن قالا تۇرعىندارىنا قاتىستى. سوت انىقتاعانداي، ولار بۇرىن ەسىرتكىنى ءبىر رەتتىك دوزاعا ءبولىپ، ولاردى بايلانىسسىز تۇردە ساتۋ ارقىلى اقشا تابۋعا تىرىسقان. پوليسيانىڭ نازارىنا تۇسپەۋ ءۇشىن قىلمىسكەرلەر ەسىرتكى پارتياسىن ءبولىپ-وراۋ ءۇشىن پاتەرلەردى تاۋلىككە جالعا الىپ وتىرعان. كەيىننەن ولار قاماۋعا الۋ ءقاۋپىن ازايتىپ، كىرىستەرىن كوبەيتۋ تۋرالى شەشىم قابىلداپ، مەفەدرون ءوندىرىسىن ۇيىمداستىرعان. ساياجاي ءۇيىن جالعا الىپ، وندىرىسكە قاجەتتى حيميالىق زاتتار مەن جابدىقتار اكەلگەن. بۇل ۋاقىتتا ولار پوليسيانىڭ باقىلاۋىندا ەدى. ءتورت كۇننەن كەيىن ەسىرتكىنىڭ ءبىرىنشى پارتياسىن ءوندىرۋ كەزىندە قىلمىسكەرلەر ۇستالعان.
ساياجاي ءۇيىن ءتىنتۋ بارىسىندا پوليسيا قىزمەتكەرلەرى ءوندىرىستىڭ سوڭعى ساتىسىنداعى مەفەدرون ەرىتىندىسىن، ەسىرتكى ىزدەرى بار جابدىقتى جانە ونى دايىنداۋ مەن وتكىزۋگە قاجەتتى ءتۇرلى زاتتاردى تاپقان. ساراپتاما ناتيجەلەرى كورسەتكەندەي، تاركىلەنگەن سينتەتيكالىق ەسىرتكىنىڭ سالماعى 4 كەلى قۇرادى، بۇل اسا ءىرى ولشەم بولىپ ەسەپتەلەدى. سوتتالۋشىلاردىڭ جاس بالالارىنىڭ بار بولۋىن، سونداي-اق ولاردىڭ تەرگەۋگە بەلسەندى جاردەمدەسۋىن ەسكەرە وتىرىپ، ح. يسلاموۆ پەن س. ەپيفانوۆ ءارقايسىسىنا 11 جىلعا باس بوستاندىعىنان ايىرىلدى.
ەكىنشى ۇكىم الماتى قالاسىنىڭ 27 جاستاعى تۇرعىنى م. شيەۆسوۆقا قاتىستى بولدى، ول دا ساتۋ ءۇشىن مەفەدرون ءوندىرىسىن ۇيىمداستىرعان. ايىپتالۋشى كورسەتكەندەي، ەسىرتكىنىڭ العاشقى پارتيالارى دۇرىس شىقپاعان، جاساي الماعان. سوندىقتان سينتەتيكا ءوندىرىسى ءۇشىن ول ءوزىنىڭ تۇرعىلىقتى جەرىنەن الىس ەمەس جەردە پاتەر جالداپ، ەكى كۇن بويى ونى “تەحنولوگيالىق پروسەستى” مۇقيات ساقتاپ وتىرىپ دايىنداعان. ءتىنتۋ بارىسىندا جالعا الىنعان پاتەردە قىلمىستى اسا ءىرى مولشەردە ەسىرتكى ءوندىرىسى رەتىندە سارالاۋعا مۇمكىندىك بەرەتىن بارلىق دالەلدەر تابىلعان. ولاردى وندىرۋگە جانە ولشەپ وراۋعا ارنالعان جابدىقتار، سونداي-اق 200 گرامم دايىن زات تاركىلەندى. سوت وتىرىستارىندا شيەۆسوۆ جەكە تۇتىنۋ ءۇشىن ەسىرتكى شىعارعانىن ايتىپ، جازانى ازايتۋعا تىرىسقان. الايدا سوتقا ۇسىنىلعان دالەلدەر بۇل ايعاقتاردى جوققا شىعارۋعا مۇمكىندىك بەردى. ناتيجەسىندە، شيەۆسوۆ 297-باپتا (ەسىرتكى قۇرالدارىن، پسيحوتروپتىق زاتتاردى، سول تەكتەستەردى اسا ءىرى مولشەردە وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ، جونەلتۋ نە وتكىزۋ) كوزدەلگەن قىلمىستى جاساۋدا كىنالى دەپ تانىلدى. 10 جىل مەرزىمگە باس بوستاندىعىنان ايىرۋ جازاسى تاعايىندالدى. ۇكىمدەر زاڭدى كۇشىنە ەندى. سوتتالعاندار جازاسىن قاۋىپسىزدىگى بارىنشا جوعارى قىلمىستىق-اتقارۋ جۇيەسى مەكەمەلەرىندە وتەيتىن بولادى.