600-دەن استام تاربيەلەنۋشى قوسىمشا تەگىن ءبىلىم الادى.
الماتى قالاسىنىڭ بارلىق اۋداندارىندا قۇرىلعانىنا 4 جىل بولعان «شىڭعا ورلەۋ» الەۋمەتتىك كلۋبىنىڭ 10 بولىمشەسى ءساتتى جۇمىس ىستەۋدە. كلۋبتا كۇنىنە 600-دەن استام تاربيەلەنۋشى قوسىمشا تەگىن ءبىلىم الادى. جوبانى جۇزەگە اسىرۋ ءۇشىن 150-دەن استام اعا بۋىن وكىلدەرى – زەينەتكەرلەر، مۇمكىندىگى شەكتەۋلى جاندار، كوپ بالالى انالار، بالا كەزىنەن مۇگەدەكتەردىڭ قامقورشىلارى تۇراقتى جۇمىسقا ورنالاستىرىلعان، دەپ حابارلايدى Almaty-akshamy.kz.
2022 جىلدىڭ 1 قاراشا كۇنى كلۋبتىڭ قۇرىلعانىنا وراي تاربيەلەنۋشىلەر مەن ۇستاز-تالىمگەرلەر مەرەكەلىك ءىس-شارا دايىنداعان. ءىس-شارا 2022 جىلدىڭ 1 قاراشا كۇنى ساعات 10.00-دە ءى.جانسۇگىروۆ اتىنداعى № 130 مەكتەپ گيمنازياسىندا "تاستاق-1" ىقشاماۋدانى، 26 ا مەكەنجايى بويىنشا وتەدى.
«شىڭعا ورلەۋ» الەۋمەتتىك جوباسى 2019 جىلدىڭ 1 قاراشا كۇنى استانا قالاسىنداعى تاۋەلسىزدىك سارايىندا وتكەن «قازاقستاننىڭ ۇزدىك الەۋمەتتىك جوبالارى» (ەلدىڭ 224 الەۋمەتتىك جوباسىنىڭ اراسىندا) VII رەسپۋبليكالىق كورمەسىندە «شىڭعا ورلەۋ» الەۋمەتتىك جوباسى II ورىنعا يە بولدى. قازىرگى ۋاقىتتا الەۋمەتتىك جوبا قوسىمشا ءبىلىم بەرۋ قىزمەتتەرى نارىعىندا لايىقتى ورىن الادى. جوبا قىزمەتى 1-4 سىنىپ وقۋشىلارىنا ومىرلىك تاجىريبەسىن، ءبىلىمى مەن داعدىلارىن بەرۋدىڭ ۇيلەسىمدى پروسەسىن قالىپتاستىرۋ ارقىلى ەلىمىزدىڭ جاس جانە اعا ۇرپاقتارى اراسىنداعى ساباقتاستىق قاعيداتتارىن قالىپتاستىرا وتىرىپ، از قامتىلعان وتباسىندا تاربيەلەنگەن باستاۋىش مەكتەپ جاسىنداعى بالالارعا تۇلعالىق دامۋىنا قولايلى جاعداي جاسايدى.