الماتىدا «شىمبۇلاق» تاۋ كۋرورتىنىڭ مەرەيتويلىق ماۋسىمى اشىلادى، دەپ حابارلايدى Almaty-akshamy.kz
الماتىدا 23 جەلتوقساندا شىمبۇلاق تاۋ كۋرورتىنىڭ 70 جىلدىعىنا وراي مەرەيتويلىق سىرعاناۋ ماۋسىمى اشىلادى. كۋرورتتىڭ تاريحى 1954 جىلى «شىمبۇلاقتا» تاۋ شاڭعىسى سپورتىنان العاشقى بۇكىلوداقتىق جارىستار وتكىزىلە باستاعان كەزدەن باستالادى. 1983 جىلدان باستاپ شىمبۇلاق تاۋ شاڭعىسىنان دايارلايتىن وليمپيادالىق ورتالىققا اينالدى. ال 2010 جىلى «مەدەۋدەن» «شىمبۇلاق» بازالىق ستانساسىنا دەيىن گوندولا جولى ىسكە قوسىلدى.
ماۋسىمنىڭ اشىلۋىنا وراي تاۋ كۋرورتى قوناقتارعا ءبىرقاتار وزگەرىستەر دايىندادى:
- كومبي-1 ورتا ستانساسىندا جاڭا اقپاراتتىق ورتالىق اشىلادى.
- بالالاردى شاڭعىعا ۇيرەتۋ ءۇشىن «شىمبۇلاق» بازالىق ستانساسىندا اق بارسيك جاڭا وقۋ تراسساسى ىسكە قوسىلادى.
- Medeu Camp گلامپينگ اۋماعىندا «Monti Bambini» مەيرامحاناسىنىڭ اشىلۋى وتەدى.
- «تالعار اسۋى» ستانساسىندا SYÑ 32 مەيرامحاناسىنىڭ اشىلۋى وتەدى.
- «مەدەۋ» بازالىق ستانساسىنىڭ اۋماعىندا «Shymbulak Medeu Camp» بالالار تاۋ لاگەرى اياسىندا وتباسىلىق دەمالىسقا ارنالعان گلامپينگ ۇيىمداستىرىلادى.
- «مەدەۋ» بازالىق ستانساسىندا اۋدانى 1 100 م2 شىعارماشىلىق حابتىڭ اشىلۋى وتەدى.
- «شىمبۇلاق» بازالىق ستانسپسىندا pop-up Park اشىلۋى وتەدى.
ايتا كەتۋ كەرەك، 2011 جىلى شىمبۇلاقتا قىسقى ازيا ويىندارىنا وراي جاڭعىرتۋ جۇمىستارى جۇرگىزىلدى. 2017 جىلى تاۋ شاڭعىسى، سنوۋبورد جانە فريستايلدان دۇنيەجۇزىلىك قىسقى ۋنيۆەرسيادا ءوتتى. 2019 جىلدان باستاپ كۋرورتتا فريستايلدان الەم كۋبوگىنىڭ كەزەڭدەرى وتكىزىلۋدە. سونداي-اق 2021 جىلى تاۋەلسىز قازاقستان تاريحىندا العاش رەت فريستايلدان الەم چەمپيوناتى وتكىزىلدى.
سونىمەن قاتار، 2023 جىلدىڭ 26 ناۋرىزىندا «شىمبۇلاق» گيننەستىڭ رەكوردتار كىتابىنا «الەمدەگى ەڭ بيىك تۇنگى شاڭعى تراسساسى» بار كۋرورت رەتىندە رەسمي تۇردە ەندى.