وڭىرلىك كوممۋنيكاسيالار قىزمەتىنىڭ بريفينگىندە ەاەو ەلدەرىنەن كەلگەن شەتەلدىك ازاماتتار مەن ەڭبەك ميگرانتتارى الماتىداعى ەمحاناعا قالاي تىركەلىپ، قالاي مەديسينالىق كومەك الا الاتىنى جونىندە ايتىلدى، دەپ حابارلايدى اlmaty-akshamy.kz.
رەسپۋبليكالىق ەلەكتروندى دەنساۋلىق ساقتاۋ ورتالىعىنىڭ الماتى قالالىق فيليالىنىڭ ديرەكتورى گۇلنار ىسقاقوۆا قازاقستاندا 15 قازاندا العاشقى مەديسينالىق-سانيتارلىق كومەك ۇيىمدارىنا ەركىن تاڭداۋ ارقىلى جىل سايىنعى تىركەلۋ ناۋقانى باستالعانىن جانە ول 15 قاراشاعا دەيىن جالعاساتىنىن ايتتى.
«بۇگىندە الماتىدا العاشقى مەديسينالىق-سانيتارلىق كومەكتى 73 العاشقى مەديسينالىق-سانيتارلىق كومەك ۇيىمى كورسەتەدى، ونىڭ 40-ى مەملەكەتتىك، قالعانى جەكەمەنشىك. بۇگىنگى تاڭدا 6 جاڭا تاپسىرىس جەتكىزۋشى العاشقى مەديسينالىق-سانيتارلىق كومەك كورسەتۋگە جانە تىركەۋگە نيەت ءبىلدىردى»، - دەدى گ.ىسقاقوۆا
تىركەلۋدىڭ ءۇش مۇمكىندىگى بار: تىركەلۋ ناۋقانى اياسىندا، ەركىن تاڭداۋ جانە قونىس اۋدارۋعا بايلانىستى. گ.ىسقاقوۆا قاجەت بولعان جاعدايدا ۋچاسكەلىك دارىگەر سىزگە كومەكتەسىپ، ۇيدە باقىلاپ وتىرۋى ءۇشىن تۇراقتى تۇرعىلىقتى جەردە ورنالاسقان ەمحانانى تاڭداۋدى ۇسىنادى.
سونداي-اق ول وتكەن جىلدىڭ 15 تامىزىنان باستاپ شەتەلدىكتەر مەن ەڭبەك ميگرانتتارى ءۇشىن العاشقى مەديسينالىق-سانيتارلىق كومەك كورسەتەتىن ۇيىمدارعا تىركەلۋ ەرەجەلەرى وزگەرگەنىن ايتتى. ەندى ولاردا ەرىكتى مەديسينالىق ساقتاندىرۋ شارتى بولۋى كەرەك.
«ەگەر شەتەل ازاماتى قازاقستان رەسپۋبليكاسىنىڭ اۋماعىندا تۇراقتى تۇراتىن بولسا نەمەسە تۇرۋعا ىقتيارحاتى بولسا، ول مىندەتتى مەديسينالىق ساقتاندىرۋ جۇيەسى جانە مەديسينالىق كومەكتىڭ كەپىلدىك بەرىلگەن كولەمى بويىنشا كومەك الۋعا قۇقىلى. بۇگىنگى تاڭدا الماتى قالاسىنىڭ ەمحانالارىنا 22 مىڭنان استام شەتەل ازاماتى تىركەلگەن. ولاردىڭ ىشىندە رەسەي فەدەراسياسىنىڭ 5 مىڭنان استام ازاماتى بار»، - دەدى گ.ىسقاقوۆا.
الماتى قالالىق قوعامدىق دەنساۋلىق ساقتاۋ دەپارتامەنتى ەمدەۋ-پروفيلاكتيكالىق ءىس-شارالار ءبولىمىنىڭ باسشىسى ءلايلا يمانعالييەۆا ناۋقان بارىسىندا العاشقى مەديسينالىق-ساراپتامالىق كومەك ۇيىمىنا تىركەلگەن ازاماتتار ول ارقىلى تەك 2023 جىلدىڭ 1 قاڭتارىنان باستاپ مەديسينالىق كومەك الا باستايتىنىن ايتتى. ياعني، 31 جەلتوقسانعا دەيىن ولارعا بۇعان دەيىن تىركەلگەن ەمحانادا قىزمەت كورسەتۋ جالعاسادى.