سوت ۇكىمى زاڭدى كۇشىنە ەنگەن جوق
الماتى قالاسى اكىمشىلىك قۇقىقبۇزۋشىلىق جونىندەگى مامانداندىرىلعان اۋدانارالىق سوتىندا قوعامدىق ورىندارداعى مازالاۋ فاكتىسى (ق ر ءاق كودەكسى 449 بابى، 2 بولىگى) بويىنشا تاكسي جۇرگىزۋشىسىنە قاتىستى سوت پروسەسى اياقتالدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
سوت قاۋلىسى بويىنشا، تاكسي جۇرگىزۋشىسى اكىمشىلىك قۇقىق بۇزۋشىلىق جاساعانى ءۇشىن جانە ونىڭ قايتالانۋىنىڭ الدىن الۋ ماقساتىندا كىنالى دەپ تانىلىپ، وعان 5 تاۋلىك مەرزىمگە اكىمشىلىك قاماۋعا الۋ تۇرىندەگى جازا تاعايىندالدى.
سوت ۇكىمى زاڭدى كۇشىنە ەنگەن جوق.
سوت تاكسي جۇرگىزۋشىسىنىڭ بۇرىن ق ر ءاق كودەكسىنىڭ 449 بابى بويىنشا اكىمشىلىك جاۋاپكەرشىلىككە تارتىلعانىن انىقتادى. ول 2023 جىلى 21 مامىردا الماتى قالاسىنداعى حالىقارالىق اۋەجايدىڭ اۋماعىندا قوعامدىق ءتارتىپتى بۇزا وتىرىپ، ءۇندىستان ازاماتىنا تاسىمالداۋ قىزمەتتەرىن كورسەتۋ ماقساتىندا مازاسىن العان.
"سوت وتىرىسىندا م. جاسالعان قۇقىقبۇزۋشىلىقتىڭ ءمان-جايىن راستاپ، كىناسىن مويىندادى جانە جاساعان كىناسىنە وكىنەتىنىن مالىمدەدى. سوت اكىمشىلىك جازانىڭ ءتۇرى مەن مولشەرىن ايقىنداۋ كەزىندە ادەپتىلىك قاعيدالارىن ەلەمەۋ، اينالاسىنداعىلارعا قۇرمەتسىزدىك تانىتۋ، جول بەرىلمەيتىن ىس-ارەكەت، ياعني ازاماتتاردىڭ مازاسىن الۋ سەكىلدى كۋالاندىرىلعان قۇقىقبۇزۋشىلىقتىڭ ناقتى ءمان-جايلارىن نازارعا الدى"، دەلىنگەن سوت حابارلاماسىندا.
24 مامىردا الماتىدا ءۇندىستان ازاماتتارىن 800 دوللار بەرۋگە ماجبۇرلەگەن تاكسي جۇرگىزۋشىسىنىڭ قىلمىستىق جاۋاپكەرشىلىككە تارتىلعانى بەلگىلى بولدى. 21 مامىردا جەكە تاسىمالداۋمەن اينالىساتىن الماتىلىق ءۇندىستاننان كەلگەن تۋريستەردى كولىگىنە وتىرعىزىپ، ولاردى الماتى حالىقارالىق اۋەجايىنان قوناق ۇيگە دەيىن 1 مىڭ تەڭگەگە اپارۋعا ۋادە بەرەدى. الايدا، دىتتەگەن جەرگە جەتكەندە تاكسي جۇرگىزۋشىسى جولاۋشىلاردان 1180 دوللار تالاپ ەتكەن. ول شەتەلدىكتەرگە زاتتارىن بەرمەيمىن دەپ قورقىتقان. اقىرىندا تۋريستەر وعان 800 دوللار بەرۋگە ءماجبۇر بولىپتى.