الاياقتىڭ بۇل ارەكەتىنەن كەلگەن جالپى شىعىن - 2،5 ملن تەڭگە
الماتىدا شەتەلدىك كولىكتەردى تىركەپ بەرەمىن دەپ جۇرتتى الداعان الاياق ۇستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالالىق پوليسيا دەپارتامەنتىنىڭ مالىمەتىنشە، ي.ەسىمدى ەر ادام «سارافاندىق راديو» ءادىسى ارقىلى شەتەلدىك كولىكتى تىركەۋدەن وتكىزگىسى كەلەتىندەردى تاۋىپ، كەدەندىك راسىمدەۋسىز جاساۋعا ۋادە بەرگەن. ەر ادام ءوز قىزمەتىن 700 مىڭ تەڭگەگە باعالاعان.
«كۇدىكتى قاماۋعا الىندى. ول الداۋدىڭ ءتورت فاكتىسىن مويىندادى. ونىڭ ارەكەتىنەن كەلتىرىلگەن جالپى شىعىن شامامەن 2،5 ملن تەڭگە. اتالعان فاكتى بويىنشا سوتقا دەيىنگى تەرگەۋ امالدارى جۇرگىزىلۋدە»، – دەدى تۇركسىب اۋداندىق پوليسيا باسقارماسى جانىنداعى پوليسيا ءبولىمىنىڭ باستىعى مەيىرحان جاڭابايەۆ. پوليسيا وكىلىنىڭ ايتۋىنشا، كۇدىكتى وسىعان ۇقساس باپ بويىنشا سوتتى بولعان. ءقازىر ۋاقىتتا كۇدىكتى ۋاقىتشا ۇستاۋ يزولياتورىندا.