كوزگە ادەمى كورىنەتىن دۇنيەنىڭ ءبارى كوڭىلگە دە جايلىلىق سىيلايدى.
استانا كۇنىنىڭ قارساڭىندا تۇركسىب اۋدانىندا جاڭا ارت-نىسان اشىلىپ، تۇرعىندار تاعى ءبىر قۋانىشتى مەرەكەلەدى، دەپ حابارلادى Almaty-akshamy.kz.
جالپى، رەسپۋبليكا شەڭبەرىندە كاسىپكەرلەر ءوزارا بىرىگىپ، قوعامدىق بىرلەستىك قۇرىپ، جينالعان اقشاعا وسى نىساندى جاساتقان. «شەكسىز ماحاببات» دەپ اتالاتىن ارت-نىساندى الماتىعا سىيعا تارتتى.
وتانعا دەگەن، الەمگە دەگەن، جاقىندارىڭىز بەن تۋىستارىڭىزعا دەگەن سۇيىسپەنشىلىكتى بىلدىرەتىن جاڭا نىسان اۋداننىڭ ارباتىنان ورىن تەپتى. اشىلۋ سالتاناتىنا تۇركسىب اۋدانى اكىمىنىڭ ورىنباسارى ەمەك بەسەۋوۆ پەن مادەنيەت جانە تىلدەردى دامىتۋ ءبولىمىنىڭ باسشىسى قانات الىمبەتوۆ قاتىسىپ، ىزگى تىلەكتەرىمەن ءبولىستى. ءىس-شاراعا قاتىسقان جوبا كاسىپكەرلەرى بۇل باستامانىڭ ءالى دە جالعاسىن تاباتىنىن ايتىپ ءوتتى.
«پاندەميالىق احۋالعا بايلانىستى كوپ ادامدار ءقازىر نەگاتيۆتى كوڭىل كۇيدە ءجۇر. كوزگە ادەمى كورىنەتىن دۇنيەنىڭ ءبارى كوڭىلگە دە جايلىلىق سىيلايدى. پاركتە سەرۋەندەپ جۇرگەن تۇرعىنداردى سۇيىسپەنشىلىككە، جىلۋلىققا بولەيتىن مۇنداي نىسانداردىڭ قاتارى ارتقانى دۇرىس. ءارى قالامىزعا دا كورىك بەرەدى. سوندىقتان مۇنداي باستامالاردىڭ ودان ءارى جالعاسىن تاپقانى قۇبا-قۇپ»، – دەدى مادەنيەت جانە تىلدەردى دامىتۋ ءبولىمىنىڭ باسشىسى قانات الىمبەتوۆ.