الماتىدا «شارىقتاسىن ءشامشىنىڭ اسىل ءانى» اتتى كونسەرت ءوتتى

كەشتە ءشامشىنىڭ كوپكە تانىلا قويماعان اندەرى شىرقالدى

الماتىنىڭ رەسپۋبليكا سارايىندا «شارىقتاسىن ءشامشىنىڭ اسىل ءانى» اتتى كونسەرت ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ۇلتتىق جانە ۆوكالدى اسپاپتار ءانسامبلىنىڭ سۇيەمەلدەۋىمەن كەشتە ءشامشىنىڭ كوپكە تانىلا قويماعان اندەرى شىرقالدى. ايتا كەتەيىك، زالدى كورەرمەنگە لىق تولتىرعان كونسەرتتىڭ ۇيىمداستىرۋشىسى - تۇركىستان وبلىسىنىڭ قالداياقوۆ اتىنداعى فيلارمونياسى.

«قازاق ءانى دەسە ءشامشى كىمنىڭ بولسا دا كوز الدىنا ەلەستەيدى. مۇنداعى حالىقتىڭ كەلۋى دە، بيلەتتىڭ ءوتۋى دە ءبىزدىڭ كوڭىلىمىزدەن شىعىپ، قاتتى قۋانىپ وتىرمىز. الماتى قالاسىنىڭ مادەنيەت باسقارماسىنا راقمەتىمىزدى ايتقىمىز كەلەدى وسىنداي مۇمكىندىك بەرگەنىنە»، – دەدى تۇركىستان وبلىسى مادەنيەت باسقارماسىنىڭ باسشىسى ءازىمحان قويلىبايەۆ.

ءشامشىنىڭ ومىرشەڭ اندەرىن دارىپتەۋدى ماقسات ەتكەن كونسەرتكە تۇركىستان وبلىسىنىڭ مادەنيەت قايراتكەرلەرىمەن قاتار، ەلىمىزدىڭ تانىمال انشىلەرى دە قاتىستى.

«كونسەرتتىڭ ەرەكشەلىگى وزدەرىڭىز كورىپ وتىرعانداي، «سۇگىر» اتىنداعى ۇلت اسپاپتار وركەسترىمەن ءبارى جاندى داۋىستا ءوتتى. ءشامشى اتامىزدىڭ بۇكىل ءانى شىرقالدى. مەن ويلايمىن، بۇگىنگى كونسەرتكە كەلگەن حالقىمىز ريزا بولادى»، – دەدى ءداستۇرلى ءانشى ناركەنجە سەرىكبايەۆا.