الماتى قالاسى "وتباسى بانك" اق فيليالى ديرەكتورىنىڭ ورىنباسارى داناگۇل ءتۇسىپوۆا وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا تابىسى تومەن وتباسىلار ءۇشىن قالادا تۇرعىن ءۇي سەرتيفيكاتتارىن بەرۋ باعدارلاماسىنىڭ ىسكە اسىرىلۋى تۋرالى ايتتى.
د. ءتۇسىپوۆانىڭ ايتۋىنشا، تۇرعىن ءۇي سەرتيفيكاتى يپوتەكالىق نەسيە بويىنشا باستاپقى جارنانىڭ ءبىر بولىگىن جابۋ ءۇشىن بەرىلەدى.
"ونى تابىسى ايىنا ەڭ تومەنگى كۇنكورىس دەڭگەيىنىڭ 3،1 ەسەلىك كورسەتكىشىنەن اسپايتىن ءوتىنىش بەرۋشىلەر الادى. 2021 جىلى ەڭ تومەنگى كۇنكورىس دەڭگەيى 34 302 تەڭگەنى قۇرايدى. الەۋمەتتىك كومەك قايتارىمسىز نەگىزدە كورسەتىلەدى. مىسالى، وتباسىندا 6 ادام تۇراتىن بولسا، وندا ءاربىر وتباسى مۇشەسىنىڭ تابىسى 106 مىڭ تەڭگەدەن اسپاۋى ءتيىس"، – دەپ ءتۇسىندىردى "وتباسى بانكىنىڭ" وكىلى.
سونداي-اق سپيكەر تۇرعىن ءۇي سەرتيفيكاتىن بەرۋ ءتارتىبى تۋرالى ايتتى. ماسەلەن، تۇرعىن ءۇيدى بانك كليەنتى اكىمدىكتە كەزەكتە تۇرعان وڭىردە عانا ساتىپ الۋعا بولادى. تۇرعىن ءۇي سەرتيفيكاتىن الۋعا وتىنىمدەردى قابىلداۋ الماتىدا 2 شىلدەدەن باستالادى. سونداي-اق ولاردى ءبىرىنشى كەزەكتە ءوتىنىش بەرگەن العاشقى 2 مىڭ ادام الادى.
"الماتىدا "شاڭىراق" باعدارلاماسى بويىنشا كەزەكتە تۇرعان 99 ازاماتقا ءتورت سانات بويىنشا تۇرعىن ءۇي سەرتيفيكاتىن الۋ رۇقسات ەتىلدى. "باقىتتى وتباسى" باعدارلاماسى بويىنشا 183 سەرتيفيكات ماقۇلداندى. اقشا كەزەكتە تۇرعان ادامنىڭ "وتباسى بانكتەگى " شوتىنا اۋدارىلادى"، – دەدى د. ءتۇسىپوۆا.
ايتا كەتەرلىگى، قازاقستاندا "شاڭىراق" باعدارلاماسى تۇراقتى تۇردە، ال “باقىتتى وتباسى" باعدارلاماسى ۋاقىتشا جۇمىس ىستەيدى. ونى ىسكە اسىرۋعا رەسپۋبليكا بويىنشا تەك 70 ملرد تەڭگە ءبولىندى.
"وتباسى بانكىنىڭ" وكىلى تۇرعىن ءۇي ساتىپ الۋعا باستاپقى جارناسى جوق قازاقستاندىقتارعا ءوز بانكتەرىندە شوتتار اشۋدى جانە باستاپقى جارناعا ازداپ اقشا جيناقتاۋدى ۇسىندى. "وتباسى بانكتەگى" جيناقتاردىڭ ارتىقشىلىعىنا مەملەكەتتىك سىيلىقاقى، سونداي-اق جەڭىلدەتىلگەن شارتتار كىرەدى.