الماتىنىڭ سانيتارلىق جاعدايىن جاقسارتۋ: جاڭا كونتەينەرلىك الاڭدار سالۋ جانە ەسكى قوقىس كونتەينەرلەرىن اۋىستىرۋ
الماتىنىڭ سانيتارلىق جاعدايى مەن ەستەتيكاسىن جاقسارتۋ جونىندەگى كەشەندى ءىس-شارالار اياسىندا 2025 جىلى 581 جاڭا كونتەينەرلىك الاڭ سالۋ جانە تەرەڭدەتىلگەن ۇلگىدەگى 1 683 كونتەينەر ورناتۋ جوسپارلانۋدا. بۇل تۋرالى قالانىڭ ءۇش جىلدىق بيۋدجەتى بەكىتىلگەن ءماسليحاتتىڭ كەزەكتەن تىس سەسسياسى كەزىندە بەلگىلى بولدى.
زاماناۋي كونتەينەرلەر كەڭىستىكتى پايدالانۋدى وڭتايلاندىرۋعا، الاڭ كولەمىن ازايتۋعا، جاعىمسىز يىستەردىڭ الدىن الۋعا جانە قۇستار مەن قاڭعىباس جانۋارلاردان سەنىمدى قورعاۋدى قامتاماسىز ەتۋگە كومەكتەسەدى. بۇگىنگى تاڭدا قالادا وسىنداي 786 كونتەينەر ورناتىلعان، بۇل تۇرعىندار ءۇشىن نەعۇرلىم تازا جانە جايلى قالالىق كەڭىستىك قۇرۋداعى ماڭىزدى قادام بولىپ تابىلادى.
سونىمەن قاتار، 2024 جىلى الماتىدا تۇرمىستىق قاتتى قالدىقتاردى جيناۋ ءۇشىن كولەمى 1 م3 بولاتىن 1800 پلاستيكالىق ەۋروكونتەينەر ساتىپ الىندى. بۇل كونتەينەرلەر قوقىس شىعاراتىن ۇيىمدارعا تاراتىلادى، بۇل قالدىقتاردى كادەگە جاراتۋ پروسەستەرىن جاقسارتۋعا مۇمكىندىك بەرەدى.
ەستەرىڭىزگە سالا كەتەيىك، 2012 جىلى الماتىدا 197 كونتەينەر الاڭى سالىنىپ، 1001 كونتەينەر ورناتىلدى. الايدا، اگرەسسيۆتى ورتادا جۇمىس ىستەگەن 10 جىل ىشىندە بۇل كونتەينەرلەر ايتارلىقتاي كورروزياعا ۇشىرادى. كونتەينەرلەردى ودان ءارى پايدالانۋ ءۇشىن الماتىدا جوعارى ساپالى باستاپقى تاعامدىق ەكولوگيالىق تازا پوليەتيلەندى قولداناتىن وتاندىق وندىرۋشىدەن جاڭا ونىمدەر ساتىپ الىنادى. بۇل ماتەريالدار الەمدىك ستاندارتتارعا سايكەس، ال ءوندىرىس تەحنولوگياسى بۇكىل ءونىم بويىنشا بىركەلكى قالىڭدىعى بار، تىگىستەرسىز جانە ىشكى كەرنەۋلەرسىز كونتەينەرلەر جاساۋعا مۇمكىندىك بەرەدى، بۇل كونتەينەرلەردىڭ سەنىمدىلىگىن، ۇزاقتىلىعى مەن بەرىكتىگىن ەداۋىر ارتتىرادى.