الماتىدا سانيتارلىق-ەپيدەميولوگيالىق باقىلاۋ ورگاندارىنىڭ زاڭسىز ارەكەتتەرى انىقتالدى

باقىلاۋ قىزمەتكەرلەرى بارلىق جەردە زاڭ بۇزۋشىلىقتاردى جويۋ مەرزىمىن كورسەتەتىن نۇسقاما بەرىپ، زاڭدا كوزدەلگەن مەرزىمدى ازايتقان.

الماتى قالاسىنىڭ پروكۋراتۋراسى «اتامەكەن» كاسىپكەرلىك پالاتاسىنىڭ قاتىسۋىمەن تەكسەرۋ ناتيجەلەرى بويىنشا سانيتارلىق-ەپيدەميولوگيالىق باقىلاۋ ورگاندارىنىڭ قازاقستان رەسپۋبليكاسىنىڭ كاسىپكەرلىك كودەكسىنىڭ تالاپتارىنا سايكەس كەلمەيتىن ۇيعارىمدار شىعارۋ ارقىلى كاسىپكەرلەردىڭ قۇقىقتارىن بۇزۋ فاكتىلەرىن انىقتادى، دەپ حابارلايدى Almaty-akshamy.kz.

الماتى قالالىق پروكۋراتۋراسى باسپا ءسوز قىزمەتىنىڭ حابارلاۋىنشا، كاسىپكەرلىك كودەكستىڭ 152-1-بابىنىڭ 3-تارماعىنا سايكەس انىقتالعان زاڭ بۇزۋشىلىقتاردى جويۋ تۋرالى ۇيعارىمدى ورىنداۋ مەرزىمى ونى ورىنداۋدىڭ ناقتى مۇمكىندىگىنە اسەر ەتەتىن ءمان-جايلارعا قاراماستان 10 كۇنتىزبەلىك كۇننەن كەم ەمەس بولۋى كەرەك.

دەگەنمەن، سانيتارلىق-ەپيدەميولوگيالىق باقىلاۋ قىزمەتكەرلەرى بارلىق جەردە زاڭبۇزۋشىلىقتاردى جويۋ مەرزىمىن كورسەتەتىن نۇسقاما بەرىپ، زاڭدا كوزدەلگەن مەرزىمدى ازايتقان.

ماسەلەن، ءدامحانالاردىڭ بىرىندە جۇرگىزىلگەن تەكسەرۋ قورىتىندىسى بويىنشا كاسىپكەرگە ۇيعارىم شىعارىلىپ، وندا انىقتالعان بۇزۋشىلىقتاردى جويۋ مەرزىمى زاڭسىز 2 تاۋلىكپەن شەكتەلگەن. قالانىڭ سانيتارلىق-ەپيدەميولوگيالىق باقىلاۋ ورگاندارى كاسىپكەرلەرگە بارلىعى 265 وسىنداي ۇيعارىم شىعارىپ، وندا انىقتالعان بۇزۋشىلىقتاردى جويۋ مەرزىمى زاڭسىز قىسقارتىلعان.

«پروكۋرورلار ءتيىستى شارالار قابىلداپ، بارلىق زاڭسىز قاۋلىلاردىڭ كۇشى جويىلدى، كىنالىلەر تارتىپتىك جاۋاپقا تارتىلدى»، - دەلىنگەن حابارلامادا.