ەل ۇزدىكتەرى الماتىعا جينالدى. وندا سامبو مەن قازاق كۇرەسىنەن ءاليا مولداعۇلوۆانىڭ 100 جىلدىعىنا ارنالعان اسكەريلەر اراسىنداعى اشىق بىرىنشىلىك ءوتتى.
ارمياشىلار سپورت كەشەنىندە ۇيىمداستىرىلعان جارىسقا 400 دەن اسا قاتىسۋشى جينالدى، دەپ حابارلايدى aqshamnews.kz.
سامبوشىلار 7 سالماقتا سىنعا ءتۇسىپ، ايبەك قاليموۆ پەن جاندوس بەيسەنبايەۆ، ارنۇر قۋاتاي مەن سانجار نۇرسەيىت، ازات قۋانوۆ پەن بولات ساپار جانە ءادىل ورازبايەۆتار ءوز سالماقتارىندا وزا شاپتى. ال، جارىستىڭ ەكىنشى كۇنى قازاق كۇرەسىنىڭ مىقتىلارى بوز كىلەمگە شىقتى. ناتيجەسىندە بەكجان تولەپوۆ 58 كەلىدە توپ جارسا، ەرنۇر سۇلەيمەن 60 كەلىدە الدىنا جان سالمادى. سونداي-اق ءاشىم ساعىندىق پەن جۇماجان قوجامبەكوۆ، احمەتقالي ادىلەت پەن ايدار بەسكەمپىر جانە قۇدىرەت دوسىموۆتار ءوز سالماقتارىندا چەمپيون اتاندى. الىپتار باسەكەسىندە عالىمجان قىرىقباي ەشكىمگە دەس بەرمەدى.
ەربول قۇماربەك ۇلى، ق ر قورعانىس مينيسترلىگىنىڭ اپپارات باسشىسى:
- ءقازىر قورعانىس مينيسترلىگى سامبو مەن قازاق كۇرەسىنىڭ دامۋىن باستى نازاردا ۇستاپ وتىر. الداعى جوسپارىمىزدى ايتار بولساق، كۇرەس زالدارىن زاماناۋي ۇلگىدەگى قۇرالدارمەن جابدىقتاپ، اسكەري مەكتەپتەردە وقيتىن جاستاردىڭ سپورتپەن شۇعىلدانۋىنا تولىقتاي جاعداي جاساۋ. بۇل كەلەشەكتە ءوز جەمىسىن بەرىپ، سورتشىلارىمىز الەمدىك بيىكتەردى باعىندىرادى دەگەن ءۇمىت باسىم.
ارمان ابەۋوۆ، ق ر قورعانىس مينيسترلىگى سپورت كومميتەتىنىڭ ءتوراعاسى:
- وسى جىلى تامىز ايىندا تۇڭعىش رەت استانا قالاسىندا قازاق كۇرەسىنەن اسكەريلەر اراسىنداعى الەم چەمپيوناتى وتەدى. بۇگىنگى جارىس سوعان ىرىكتەۋ دەسەك تە بولادى. وسى سامبو مەن قازاق كۇرەسىنەن ۇيىمداستىرىلعان اشىق بىرىنشىلىككە بارلىق ىشكى اسكەري قۇرىلىمداردىڭ سپورتشىلارى قاتىستى. بۇل دەگەنىڭىز، قازاق كۇرەسى مەن سامبونىڭ دامۋىنا ءوز ىقپالىن تيگىزىپ، جاستاردىڭ سپورتقا دەگەن قىزىعۋشىلىعى ارتا تۇسەدى دەپ ەسەپتەيمىن.