الماتىنىڭ قالا قۇرىلىسىن باقىلاۋ باسقارماسىنىڭ حابارلاۋىنشا، ەرمەنساي شاعىن اۋدانىنداعى، 7ء-شى بۇرىلىس، 8-ۋچاسكەدە ورنالاسقان تۇرعىن ءۇي كەشەنى سوت شەشىمىمەن زاڭسىز دەپ تانىلدى.
نىسانعا جۇرگىزىلگەن جوسپاردان تىس تەكسەرۋ بارىسىندا «MGM Development» ج ش س اتالعان تۇرعىن ءۇي كەشەنىنىڭ قۇرىلىسىن سجت-سىز، ەسكيزدىك جوبانى كەلىسۋسىز، قۇرىلىس-مونتاج جۇمىستارىنىڭ باستالعانى تۋرالى حابارلاماسىز، مەملەكەتتىك ساراپتاما، اۆتورلىق جانە تەحنيكالىق قاداعالاۋسىز باستاعانى انىقتالدى.
2022 جىلى 21 جەلتوقساندا تاپسىرىس بەرۋشىگە قاتىستى اكىمشىلىك شارالار قولدانىلىپ، انىقتالعان زاڭبۇزۋشىلىقتاردى جويۋ تۋرالى نۇسقاما بەرىلدى.
2023 جىلى 25 ساۋىردە الماتى قالاسىنىڭ مامانداندىرىلعان اۋدانارالىق ەكونوميكالىق سوتىنا نىساندى ءسۇرۋ تۋرالى تالاپ ارىز بەرىلدى.
2023 جىلى 27 جەلتوقساندا الماتى قالالىق سوتى ماەس-نىڭ نىساندى ءسۇرۋ تۋرالى شەشىمىن وزگەرىسسىز قالدىردى، مەنشىك يەسىنىڭ اپەللياسيالىق شاعىمى قاناعاتتاندىرىلمادى.
بۇگىن نىساندى ءسۇرۋ جۇمىستارى ادىلەت دەپارتامەنتىنىڭ سوت ورىنداۋشىلارىنىڭ قاتىسۋىمەن باستالدى.
ەستەرىڭىزگە سالايىق، الماتى اكىمى ەربولات دوسايەۆتىڭ زاڭسىز قۇرىلىستى باقىلاۋدى كۇشەيتۋ تاپسىرماسى اياسىندا وتكەن جىلدىڭ باسىنان بەرى 50 زاڭسىز نىسان، سونىڭ ىشىندە «مەچتا»، KHAN، «الما گاردەن» تۇرعىن ءۇي كەشەندەرى جانە باسقا دا نىساندار تولىق نەمەسە جارتىلاي بۇزىلدى.