وڭىرلىك كوممۋنيكاسيالار قىزمەتىنىڭ الاڭىندا الماتى قالاسى ادىلەت دەپارتامەنتىنىڭ زاڭدى تۇلعالاردى تىركەۋ ءبولىمىنىڭ باسشىسى اقەركە قوجاحمەتوۆانىڭ قاتىسۋىمەن بريفينگ ءوتتى. سپيكەر ساياسي پارتيالاردى تىركەۋ ءراسىمىن جەڭىلدەتۋ، زاڭناماعا ۇسىنىلعان تۇزەتۋلەر تۋرالى ايتىپ بەردى، دەپ حابارلايدى اlmaty-akshamy.kz.
ونىڭ ايتۋىنشا، ساياسي پارتيانى قۇرۋ ءتارتىبى «ساياسي پارتيالار تۋرالى» زاڭمەن رەتتەلەدى.
ول 2022 جىلعى 16 ناۋرىزداعى پرەزيدەنتتىك ساياسي رەفورمالار باعدارلاماسىنا سايكەس، پارتيالاردى تىركەۋ ءراسىمىن وڭايلاتۋ كوزدەلگەنىن ەسكە سالدى. باستامالاردى زاڭنامالىق بەكىتۋدىڭ بولجامدى مەرزىمى – 2022 جىلعى جەلتوقسان.
«ساياسي پارتيا سانى ءبىر مىڭ ادامنان كەم ەمەس (بولجامدى وڭايلاتۋ – سانى جەتى ءجۇز ادامنان كەم ەمەس)، ساياسي پارتيانىڭ قۇرىلتاي سەزىن (كونفەرەنسياسىن) شاقىراتىن جانە وبلىستاردىڭ، رەسپۋبليكالىق ماڭىزى بار قالانىڭ جانە استانانىڭ ۇشتەن ەكىسىنىڭ اتىنان وكىلدىك ەتەتىن قازاقستان رەسپۋبليكاسى ازاماتتارى توبىنىڭ باستاماسى بويىنشا قۇرىلادى»، - دەپ حابارلادى اقەركە قوجاحمەتوۆا.
الماتى قالاسى ادىلەت دەپارتامەنتىنىڭ سپيكەرى كەلتىرگەن «ساياسي پارتيالار تۋرالى» زاڭنىڭ 6-بابىنىڭ كەيبىر ۇزىندىلەرىن كەلتىرەمىز:
ازاماتتار ساياسي پارتيانىڭ قۇرىلتاي سەزىنە (كونفەرەنسياسىنا) جەكە ءوزى قاتىسادى.
ساياسي پارتيانىڭ قۇرىلتاي سەزىن (كونفەرەنسياسىن) دايىنداۋ جانە وتكىزۋ ءۇشىن قازاقستان رەسپۋبليكاسى ازاماتتارىنىڭ باستاماشىل توبى مۇشەلەرىنىڭ قاتارىنان قۇرامىندا كەمىندە ون ادام بولاتىن ۇيىمداستىرۋ كوميتەتى قۇرىلادى.
ۇيىمداستىرۋ كوميتەتى ادىلەت مينيستىرلىگىنە زاڭنىڭ 10-بابىندا كوزدەلگەن قۇجاتتاردى قوسا بەرە وتىرىپ، ساياسي پارتيا قۇرۋ نيەتى تۋرالى حابارلاما ۇسىنۋعا ءتيىس.
ادىلەت مينىستىرلىگى حابارلامانى العان كۇنى ۇيىمداستىرۋ كوميتەتىنىڭ ۋاكىلەتتى ادامىنا ولاردىڭ ۇسىنىلعانىن راستايتىن قۇجاتتى بەرەدى.
ۇيىمداستىرۋ كوميتەتى تىركەۋشى ورگان راستاما بەرگەننەن كەيىن ءوز قىزمەتىنە كىرىسەدى.
بۇدان ءارى راستاۋ بەرىلگەن كۇننەن باستاپ ەكى اي ىشىندە (بولجامدى وڭايلاتۋ – مەرزىمىن ۇزارتىپ ءۇش اي ىشىندە)، ۇيىمداستىرۋ كوميتەتى ساياسي پارتيانىڭ قۇرىلتاي سەزىن (كونفەرەنسياسىن) وتكىزۋگە ءتيىس.
«ساياسي پارتيانى مەملەكەتتىك تىركەۋ ءۇشىن ونىڭ قۇرامىندا بارلىق وبلىستاردا، رەسپۋبليكالىق ماڭىزى بار قالالاردا جانە استاناداعى قۇرىلىمدىق بولىمشەلەرىنىڭ (فيليالدارى مەن وكىلدىكتەرىنىڭ) ءارقايسىسىنىڭ قۇرامىندا كەمىندە التى ءجۇز پارتيا مۇشەسى (بولجامدى وڭايلاتۋ – ەكى ءجۇز پارتيا مۇشەسىنە ازايتۋ) بار كەمىندە جيىرما مىڭ پارتيا مۇشەسى بولۋى نەگىزگى شارتتاردىڭ ءبىرى بولىپ تابىلادى (بولجامدى وڭايلاتۋ – بەس مىڭ پارتيا مۇشەسىنە ازايتۋ)»، - دەدى اقەركە قوجاحمەتوۆا.
وكق بريفينگىندە ساياسي پارتيانى مەملەكەتتىك تىركەۋ ءۇشىن قانداي قۇجاتتار قاجەت ەكەنىن حابارلادى. ولار ادىلەت مينيسترلىگىنە ساياسي پارتيانىڭ قۇرىلتاي سەزى (كونفەرەنسياسى) وتكىزىلگەن كۇننەن باستاپ ءتورت ايدان كەشىكتىرىلمەي ۇسىنىلادى.
اقەركە قوجاحمەتوۆانىڭ ايتۋىنشا، تىركەۋشى ورگانعا كەلەسى قۇجاتتار ۇسىنىلادى:
- ءوتىنىش؛
- ساياسي پارتيانىڭ باسشىسى قول قويعان ساياسي پارتيانىڭ جارعىسى مەن باعدارلاماسى ەكى دانادا؛
- ساياسي پارتيا قۇرىلتاي سەزىنىڭ (كونفەرەنسياسىنىڭ) حاتتاماسى؛
- ساياسي پارتيا مۇشەلەرىنىڭ ەلەكتروندىق جانە قاعاز جەتكىزگىشتەردەگى تىزىمدەرى؛
- زاڭدى تۇلعانى مەملەكەتتىك تىركەگەنى ءۇشىن الىم تولەنگەنى تۋرالى قۇجات (14 اەك).
ساياسي پارتيالاردى مەملەكەتتىك تىركەۋ مەرزىمى تىركەۋگە ءوتىنىش بەرىلگەن كۇننەن باستاپ 1 ايدى قۇرايدى.
ساياسي پارتيانى مەملەكەتتىك تىركەۋگە قۇجاتتار كەلىپ تۇسكەن كەزدە ۋاكىلەتتى مەملەكەتتىك ورگانداردان قورىتىندى العانعا دەيىن ازاماتتاردىڭ باستاماشىل توبى مەن ساياسي پارتيا مۇشەلەرى تىزىمدەرىنىڭ انىقتىعىنا تەكسەرۋ جۇرگىزۋ ءۇشىن تىركەۋ مەرزىمى ۇزىلەدى.
ءىس جۇزىندە ۋاكىلەتتى مەملەكەتتىك ورگانداردا پارتيا ءتىزىمىن تەكسەرۋ 2 ايعا جۋىق ۋاقىتتى الادى.
جوعارىدا اتالعان ادامداردى پارتيا مۇشەلەرىنىڭ تىزىمىندە بەلگىلەۋ، سونداي-اق مۇشەنىڭ ونى ساياسي پارتياعا قابىلداعانى تۋرالى جازباشا ەرىك ءبىلدىرۋىنىڭ بولماۋى تىركەۋدەن باس تارتۋعا نەگىز بولىپ تابىلادى. ساياسي پارتيا مەملەكەتتىك تىركەلگەن كۇننەن باستاپ التى اي ىشىندە (بولجامدى وڭايلاتۋ – ءبىر جىلعا مەرزىمىن ۇزارتۋ)، ءوزىنىڭ قۇرىلىمدىق بولىمشەلەرىن (فيليالدارى مەن وكىلدىكتەرىن) اۋماقتىق ادىلەت ورگاندارىندا ەسەپتىك تىركەۋدى جۇرگىزۋگە مىندەتتى.
پارتيانى تىركەۋ تالاپتارىن جەڭىلدەتۋ ولاردى قۇرۋ بويىنشا باستامالاردىڭ ارتۋىنا اكەلەدى، ال جوعارىدا اتالعان جاعدايلاردى ەسكەرە وتىرىپ، ولاردى قۇرۋ پروسەسىن ەداۋىر جەڭىلدەتەدى.