الماتىدا رىسقۇلوۆ داڭعىلىندا ورتاشا جوندەۋ جۇمىستارى باستالدى

بۇگىننەن باستاپ مەردىگەر ۇيىم رىسقۇلوۆ داڭعىلىن ورتاشا جوندەۋ جۇمىستارىن باستايدى.

جوندەۋ جۇمىستارى نەميروۆيچ-دانچەنكو كوشەسىنەن جانگەلدين كوشەسىنە دەيىنگى ارالىقتا جۇرگىزىلەتىن بولادى، دەپ حابارلايدى Almaty-akshamy.kz قالالىق موبيلدىلىك باسقارماسىنا سىلتەمە جاساپ.

جالپى ۇزىندىعى 4،7 شاقىرىمدى قۇرايتىن رىسقۇلوۆ داڭعىلىندا سوڭعى جوندەۋ جۇمىستارى 2013 جىلى جۇرگىزىلگەن. اتالعان داڭعىل بويىنشا كولىك اعىنى وتە جوعارى.

«تەكسەرۋ كەزىندە جول بويىندا كوپتەگەن شۇڭقىر، ويىلعان جەرلەر، قابىرشاقتانۋ جانە ينجەنەرلىك جەلىلەردى سالعاننان كەيىنگى جول توسەمىنىڭ وتىرۋى انىقتالعان. وسىنىڭ بارلىعىن ەسكەرە وتىرىپ، رىسقۇلوۆ داڭعىلىن 2022 جىلعى جول جوندەۋ جۇمىستارى جوسپارىنا قوسۋ تۋرالى شەشىم قابىلداندى»، - دەپ حابارلادى قالالىق موبيلدىلىك باسقارماسى كوشە-جول جەلىلەرىن دامىتۋ ءبولىمىنىڭ باسشىسى نۇرزات وردابايەۆ.

ەسكە سالا كەتسەك، بيىل الماتىدا 224 كوشەدە جول جابىنىنا ورتاشا جوندەۋ جۇرگىزۋ جوسپارلانۋدا. جوندەلەتىن جولداردىڭ جالپى ۇزىندىعى 200 كم قۇرايدى. اعىمداعى جىلى "قايرات"، "المەرەك"، "العاباس"، "اقجار" جانە "شاڭىراق-1" شاعىناۋداندارىندا 70 كم جاڭا جول سالۋ جوسپارلانۋدا. بۇل جاقسى جانە قاناعاتتانارلىق جاعدايداعى قالا جولدارىنىڭ ۇلەسىن 86%-عا دەيىن جەتكىزۋگە مۇمكىندىك بەرەدى.

Vision Zero تۇجىرىمداماسىنا سايكەس، ورتاشا جوندەۋدى جۇرگىزۋ اياسىندا كولىك پەن جاياۋ جۇرگىنشىلەر قوزعالىسىنىڭ قاۋىپسىزدىگىن قامتاماسىز ەتۋ ءۇشىن كوشەلەردە تراپەسيا ءتارىزدى جاساندى كەدەرگىلەردى، قاۋىپسىزدىك قاقپاقتارىن، قاۋىپسىزدىك ارالدارىن ورناتۋ بويىنشا جۇمىستار جۇرگىزىلەتىن بولادى.