الماتى قالاسىنداعى م. بازاربايەۆ اتىنداعى №138 گيمنازيادا پەداگوگيكالىق ەڭبەك ارداگەرلەرىن ۇلىقتاۋعا ارنالعان رەسپۋبليكالىق «EDUTALK» كەشى ءوتتى.
ءىس-شارادا ۇستاز ماماندىعىنىڭ ماڭىزدىلىعى، ونىڭ قيىن دا ءقادىرلى جولى مەن قوعامعا قوسقان ەلەۋلى ۇلەسى ءسوز بولدى، دەپ حابارلايدى aqshamnews.kz.
بۇل كۇنى گيمنازيادا «قازاقستاننىڭ ەڭبەك ەرى»، «قازاقستان رەسپۋبليكاسىنىڭ ەڭبەك سىڭىرگەن ۇستازى» اتاعىنا يە بولعان تانىمال پەداگوگتەر: گۇلجانار نۇرپەيىسوۆا، ورىنشا قارابالينa، مايرا مامبەتوۆا، ءلاززات ەسماعانبەتوۆا، گۇلبانۋ ماحامبەتوۆا، فيلولوگيا عىلىمدارىنىڭ دوكتورى اسىلى وسمان، قوعام قايراتكەرى، تاريح عىلىمدارىنىڭ پروفەسسورى قايىركەن كۇنافينا، ق ر مادەنيەت قايراتكەرى گۇلشارا ەسەتوۆا جانە ەلىمىزدىڭ ءار وڭىرىنەن كەلگەن مەكتەپ باسشىلارى مەن مۇعالىمدەرى باس قوستى.
كەشتىڭ شىمىلدىعى «كوكتەگى الاۋ» اتتى تەاترلاندىرىلعان قويىلىممەن اشىلدى. وندا گيمنازيانىڭ جوعارى سىنىپ وقۋشىلارى ۇلى وتان سوعىسى جىلدارىنداعى جالعىز قازاق ۇشقىش قىزى – حيۋاز دوسپانوۆا مەن سول كەزەڭدەگى ەرلىكپەن قازا تاپقان بارلىق باتىرلاردىڭ رۋحىنا ارناۋ رەتىندە ونەر كورسەتتى.
كەش بارىسىندا ۇستازدار جۇرەك تەبىرەنتەرلىك ەستەلىكتەرىمەن ءبولىسىپ، ۇستازدىقتىڭ – تەك ءبىلىم بەرۋ ەمەس، ادام تاعدىرىن وزگەرتە الاتىن ميسسيا ەكەنىن دالەلدەدى.
№138 گيمنازيا ديرەكتورى مەدەت قاسىمبايەۆ ءوزىنىڭ ءبىلىم ورداسىن باسقارۋ جولىنداعى ومىرلىك تاجىريبەسىمەن ءبولىسىپ، كورەرمەندەردىڭ ىستىق ىقىلاسىنا بولەندى.
ساحناعا شىققان ارداگەر ۇستازداردىڭ ءاربىر ءسوزىن كورەرمەندەر زور قوشەمەتپەن قارسى الدى. كەشتىڭ پىكىرتالاس بولىگى دە كورەرمەندەر قىزىعۋشىلىعىن تۋدىردى. «ۇستاز — ميسسيا ما، ماماندىق پا؟» دەگەن تاقىرىپ قىزۋ تالقىلانىپ، قاتىسۋشىلار مازمۇندى سۇراقتار قويىپ، تۇشىمدى جاۋاپتار الدى. سونداي-اق «ءبىر قاتەلىك – ۇلكەن وكىنىش»، «ءبىر كۇلكى – مىڭداعان موتيۆاسيا» سەكىلدى ومىرلىك وي تۋدىرار تاقىرىپتار كەڭىنەن تالقىلاندى.
— بۇگىنگى «EDUTALK» كەشى — اشىق ءارى شىنايى ديالوگ الاڭىنا اينالدى. ءومىر جولدارى مەن كاسىبي تاجىريبەلەرى جاس ۇرپاققا ۇلگى بولارلىق ۇستازدار جايلى ايتىلعان ءاربىر اڭگىمە جاس بۋىننىڭ ۇستاز ماماندىعىنا دەگەن قۇرمەتىن ارتتىرا ءتۇستى، — دەدى بوستاندىق اۋدانى ءبىلىم ءبولىمىنىڭ باسشىسى ايگۇل قاسىمبەك.
ءىس-شارا قازاقستان رەسپۋبليكاسى وقۋ-اعارتۋ مينيسترلىگى جانىنداعى ارداگەرلەر رەسپۋبليكالىق كەڭەسىنىڭ 2025 جىلعى 26 ناۋرىزداعى №11 حاتتامالىق تاپسىرماسىن ورىنداۋ اياسىندا جانە جالپىادامزاتتىق پەن ۇلتتىق قۇندىلىقتارعا نەگىزدەلگەن ءبىرىڭعاي تاربيە باعدارلاماسىن جۇزەگە اسىرۋ ماقساتىندا ۇيىمداستىرىلدى.