«ASSYL DOMBYRA» اقىندار ايتىسىنىڭ سۋپەر فينالى باستالدى.
الماتى قالالىق مادەنيەت باسقارماسى مەن «ASSYLTAS» قوعامدىق قورىنىڭ ۇيىمداستىرۋىمەن الماتى قالاسى، «الاتاۋ» ءداستۇرلى ونەر تەاترىندا رەسپۋبليكالىق «ASSYL DOMBYRA» اقىندار ايتىسىنىڭ سۋپەر فينالى باستالدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
الامان ايتىسقا ءتورت ىرىكتەۋ كەزەڭىنەن وتكەن 18 اقىن قاتىسادى. ولار: رينات زايىتوۆ، مۇحتار نيازوۆ، اسپانبەك شۇعاتايەۆ، مەيىربەك سۇلتانحان، شالقارباي ءىزباساروۆ، قانات مىرزاحان، قازىرەت بەردىحان، رۇستەم قايىرتاي، ەرلان امانقوجا، نۇرلان ەسەنقۇلوۆ، باۋىرجان شيرمەدين ۇلى، شۇعايىپ سەزىمحان، راۋان قايداروۆ، نۇرزات قارۋ، سەرىك قۋانعان، ايبەك جەڭىسقازين، جانسايا مۋسينا جانە نۇرماحان جاقىپبەكوۆ.
«بۇل ايتىس بۇرىنعى ايتىستان وزگەرەك. وسى جولعى ايتىستىڭ ەرەكشەلىگى اقىنداردىڭ جۇبى جەرەبەمەن انىقتالادى. ياعني اقىندار الدىن-الا كىممەن ايتىساتىنىن بىلمەيدى. ىرىكتەۋ 4 كەزەڭنەن تۇردى. بارلىعى 47 اقىن قاتىستى. بۇل دا بۇرىن-سوڭدى بولماعان كورسەتكىش. رەسپۋبليكاداعى ەڭ اۋقىمدى ايتىس وسى بولدى»، دەيدى ءجۇرسىن ەرمان.
بيىلعى ASSYL DOMBYRA اقىندار ايتىسى تاۋەلسىزدىكتىڭ 30 جىلدىعى مەن ءجۇرسىن ەرماننىڭ 70 جاس مەرەيتويىنا وراي وتكىزىلدى. سونداي-اق ءار ىرىكتەۋ كەزەڭىندە جامبىل جابايەۆتىڭ 175 جىلدىعىنا، ءمۇقاعاليدىڭ 90 جاس مەرەيتويى مەن قاسىم امانجولوۆتىڭ 110 جىلدىعىنا دا ارنالدى. ۇيىمداستىرۋشى ASSYLTAS قوعامدىق قورىنىڭ قۇرىلتايشىسى دۋلات تاستەكەيەۆتىڭ ايتۋىنشا، سۋپەرفينالدا اقىندار قوعامداعى وزەكتى پروبلەمالاردى قوزعاپ، كورەرمەندەر ناعىز شاپپا-شاپ ايتىستىڭ كۋاسى بولادى.
«سۋپەرفينالعا كىل مىقتىلار ىرىكتەلىنىپ الدى. ايتىستىڭ ەكى ىرىكتەۋ كەزەڭى الماتى قالاسىندا، ءبىرى الماتى وبلىسىندا جانە تاعى بىرەۋى ورال قالاسىندا وتكىزىلدى. ناعىز تارتىسقا تولى سايىستار ءوتتى. وسى جولى فينالدا رينات زايىتوۆتىڭ، مۇحتار نيازوۆ پەن جانسايا مۋسينا سياقتى اقىنداردىڭ بولۋى سايىستىڭ كوركىن قىزدىرادى. جەڭىمپازعا ASSYLTAS قوعامدىق قورى اسىل تاستارمەن كومكەرىلگەن ارنايى دايىندالعان دومبىرانۋ تارتۋ ەتەدى. سونداي-اق قوماقتى جۇلدەلەر تاعايىندادىق»، دەيدى دۋلات تۇرسىن ۇلى.
ASSYL DOMBYRA اقىندار ايتىسىنىڭ ءتورت ىرىكتەۋ كەزەڭىن 3 ملنعا جۋىق كورەرمەن youtube ارناسىنان تاماشالاعان. ءدال ءقازىر ءوتىپ جاتقان سۋپەرفينالدى كورەرمەندەر تىكەلەي ەفير ارقىلى ASSYLTAS TV ارناسىنان كورە الادى.
الاتاۋدان تاسقىنداعان جىر كەرۋەنى ەكى كۇنگە سوزىلماق.