«مەدەۋ» مۇز ايدىنىندا مەملەكەتتىك تۋدى كوتەرۋ بويىنشا سالتاناتتى ءراسىم ءوتتى. ءىس-شاراعا الماتى قالاسىنىڭ اكىمى ەربولات دوسايەۆ، قوعام قايراتكەرلەرى، ءماسليحات دەپۋتاتتارى، ۇكىمەتتىك ەمەس جانە جاستار ۇيىمدارىنىڭ وكىلدەرى، سونداي-اق قالا تۇرعىندارى قاتىستى.
تۋدى كوتەرۋ ءراسىمى ءداستۇر بويىنشا اسكەري وركەستردىڭ سۇيەمەلدەۋىمەن مەملەكەتتىك ءانۇراندى ورىنداۋمەن جالعاستى. مەملەكەتتىك تۋدىڭ اۋدانى 98 شارشى مەتر بولسا، بيىكتىگى 40 مەتر.
ەسكە سالا كەتەيىك، رەسپۋبليكا كۇنى قارساڭىندا قالا اكىمى ەربولات دوسايەۆ قازاقستان پرەزيدەنتى قاسىم-جومارت توقايەۆتىڭ اتىنان مەملەكەتتىك ماراپاتتاردى تابىستادى. ماراپاتتالعانداردىڭ اراسىندا ەلدىڭ الەۋمەتتىك-ەكونوميكالىق جانە مادەني دامۋىنا ەلەۋلى ۇلەس قوسقان الماتىلىقتار بار. سونداي-اق رەسپۋبليكا سارايىندا مەرەكەلىك كونسەرت ءوتتى.
بۇگىن الماتىدا مەرەكەگە وراي دروندار شوۋى وتەدى: ساعات 21:00-دە اباي الاڭىندا، ال 21:30-دا «استانا» الاڭىندا 500-دەن استام درون سينحروندى تۇردە كوككە كوتەرىلىپ، ۇلتتىق مادەنيەت ەلەمەنتتەرى مەن ەل تاريحىنداعى ماڭىزدى ساتتەردى بەينەلەيتىن 3D بەينەلەر جاسايدى. جارىق ي قوندىرعىلارى مۋزىكالىق شىعارمالارمەن سۇيەمەلدەنەدى، بۇل ۇلتتىق بىرلىك پەن ماقتانىش رۋحىن ايشىقتايدى.
بۇعان قوسا، ساعات 20:00-دە رەسپۋبليكا كۇنىنە وراي «كوكتوبە» تەلەمۇناراسىندا مەرەكەلىك ساۋلەتتىك جارىقتاندىرۋ قوسىلادى. ايتا كەتسەك، تەلەمۇنارانىڭ جارىقتاندىرۋ جۇيەسى 30 تامىزدا ىسكە قوسىلىپ، الماتىنىڭ ماڭىزدى نىساندارىنىڭ ءبىرى رەتىندە جاڭارتىلعان.