الماتىدا رەسپۋبليكا كۇنى قارساڭىندا قۇرىلىس باسقارماسى تاراپىنان بالاباقشالار مەن مەكتەپتەردىڭ جاڭا عيماراتتارىن سالۋ، كۇردەلى جوندەۋ جانە قايتا جاڭارتۋ جۇمىستارى اياقتالدى، - دەپ حابارلايدى Aqshamnews.kz.
بوستاندىق اۋدانىندا ەستۋ قابىلەتى بۇزىلعان بالالارعا ارنالعان №137 تۇزەتۋ بالاباقشاسى مەن №87 بالاباقشادا سەيسميكالىق نىعايتۋ جانە كۇردەلى جوندەۋ جۇرگىزىلدى. سونداي-اق، 240 ورىندىق جاڭا بالاباقشا عيماراتى قايتا جاڭعىرتىلدى. جاڭارتىلعان نىساندار زاماناۋي توپتىق بولمەلەرمەن، مۋزىكالىق جانە دەنە شىنىقتىرۋ زالدارىمەن، مەديسينالىق جانە تۇرمىستىق بلوكتارمەن جابدىقتالعان. بارلىق عيمارات بالالارعا جايلى ءارى ءقاۋىپسىز بولۋىنا تولىقتاي بەيىمدەلگەن.
وسى اۋداندا №73 مەكتەپ-گيمنازياسى جاڭارتىلدى. جوبا اياسىندا عيماراتتىڭ قۇرىلىمدارى نىعايتىلىپ، قاسبەتى جىلىتىلدى، ينجەنەرلىك جۇيەلەر، شاتىر جانە ىشكى ارلەۋ تولىق جاڭارتىلدى. مەكتەپتە زاماناۋي وقۋ كابينەتتەرى، كىتاپحانا، مەدياتەكا جانە اكت زالى جاساقتالدى.
مەدەۋ اۋدانىندا بالاباقشا عيماراتىنا سەيسميكالىق كۇشەيتۋمەن بىرگە كۇردەلى جوندەۋ جۇرگىزىلدى. ىشكى كەڭىستىك جاڭارتىلىپ، تاربيەلەنۋشىلەر مەن پەداگوگتار ءۇشىن جايلى جاعداي جاسالدى. بالالارعا ارنالعان ويىن جانە ۇيقى بولمەلەرى، اس بلوگى مەن مەديسينالىق ءبولىم جابدىقتالدى.
ناۋرىزباي اۋدانىندا №174 مەكتەپ-گيمنازياسىنا جاڭا قوسىمشا عيمارات سالىندى. زاماناۋي نىسان مۋلتيمەديالىق كابينەتتەرمەن، سپورت زالىمەن، بۋفەتپەن جانە دەمالىس ايماقتارىمەن قامتىلعان. ساباق وتەتىن بولمەلەر جاڭا تەحنيكالىق قۇرالدارمەن جانە ينتەراكتيۆتى پانەلدەرمەن جابدىقتالىپ، ءبىلىم بەرۋ ساپاسىن ارتتىرۋعا مۇمكىندىك بەرەدى.
بارلىق نىسان قاۋىپسىزدىك، ەنەرگيا ۇنەمدىلىك جانە جايلىلىقتىڭ زاماناۋي تالاپتارىنا تولىق سايكەس كەلەدى. بۇل جوبالاردىڭ جۇزەگە اسىرىلۋى الماتى قالاسىنىڭ الەۋمەتتىك ينفراقۇرىلىمىن دامىتۋداعى ماڭىزدى قادام بولىپ تابىلادى.