رەسپۋبليكا كۇنىنە ارنالعان مەرەكەلىك جانە رەسمي ءىس-شارالار بارلىق سەگىز اۋداندا وتەدى. قالادا بارلىق جەردە ءتۇرلى كونكۋرستار، كورمەلەر، جارمەڭكەلەر جانە باسقا دا مادەني-تانىمدىق ءىس-شارالار ۇيىمداستىرىلادى.
21 قازان كۇنى ساعات 11:00-دە قازاقستان-بريتان تەحنيكالىق ۋنيۆەرسيتەتىنىڭ ءال-فارابي اتىنداعى زالىندا رەسپۋبليكا كۇنىنە ارنالعان عىلىمي-پراكتيكالىق كونفەرەنسيا وتەدى.
اتالعان ءىس-شاراعا XII شاقىرىلىمداعى قازكسر جوعارعى كەڭەسىنىڭ تاريحي قۇجات قابىلدانعان بۇرىنعى دەپۋتاتتارى، عىلىمي زيالى قاۋىم وكىلدەرى، ۇكىمەتتىك ەمەس ۇيىمدار، الماتى ءماسليحاتىنىڭ، قالالىق مەملەكەتتىك قۇرىلىمداردىڭ دەپۋتاتتارى قاتىسادى.
22 قازان كۇنى ساعات 12:00-دە قازاقستان-بريتان تەحنيكالىق ۋنيۆەرسيتەتىندە مەملەكەتتىك جانە ۆەدومستۆولىق ناگرادالار، العىس حاتتار سالتاناتتى تۇردە تاپسىرىلادى.
22 قازان كۇنى ساعات 17:00-دە رەسپۋبليكا سارايىندا قازاقستاندىق ەسترادا جۇلدىزدارىنىڭ قاتىسۋىمەن سالتاناتتى كونسەرت وتەدى. سالتاناتتى كونسەرتكە قالا زيالىلارى، ءماسليحات دەپۋتاتتارى، مەملەكەتتىك ورگانداردىڭ، ۇيىمداردىڭ وكىلدەرى، ساياسي پارتيالاردىڭ وكىلدەرى، كورنەكتى مەملەكەت جانە قوعام قايراتكەرلەرى، ستۋدەنتتەر، اسكەري قىزمەتشىلەر شاقىرىلادى.
23 قازان كۇنى ساعات 7:00-دەن 13:00-گە دەيىن Charity Music Nur جاپپاي قايىرىمدىلىق جارىسى وتەدى. جارىس تۇڭعىش پرەزيدەنت ساياباعىنان باستالادى. قاتىسۋشىلاردىڭ جوسپارلانعان سانى – 1700-2000 ادام. جارىس كەلەسى قاشىقتىقتاردا وتكىزىلەدى: بالالار جارىسى (2 كم – 7-14 جاس)، سكانديناۆيالىق سەرۋەندەۋ (10،5 كم)، 10،5 كم جۇگىرۋ جانە 21 كم. قاتىسۋشىلاردىڭ جيىنى ساعات 6.00-دە.
25 قازان كۇنى ساعات 11:00-دە «مەدەۋ» بيىك تاۋ كەشەنىنىڭ الدىنداعى الاڭدا «پاتريوتيزم داۋىسى» اكسياسى اياسىندا مەملەكەتتىك تۋ سالتاناتتى تۇردە كوتەرىلەدى جانە ءانۇران ورىندالادى. سالتاناتتى راسىمدە ءماسليحات دەپۋتاتتارى، مەملەكەتتىك ورگانداردىڭ، ۇيىمداردىڭ وكىلدەرى، ساياسي پارتيالاردىڭ كوشباسشىلارى، كورنەكتى مەملەكەت جانە قوعام قايراتكەرلەرى، ستۋدەنتتەر، اسكەري قىزمەتشىلەر (قۇرمەتتى قاراۋىل، اسكەري-ۇرمەلى وركەستر) بولادى.
سونداي-اق، وسى ۋاقىتتا قالانىڭ بارلىق اۋداندارىندا مەملەكەتتىك ءانۇران جاپپاي ورىندالادى. (الاتاۋ اۋدانى – Almaty Arena مۇز سارايىنىڭ اۋماعىندا، المالى اۋدانى – قبتۋ عيماراتىنىڭ الدىندا، اۋەزوۆ اۋدانى – الماتى كوپسالالى كوللەدجى عيماراتىنىڭ الدىندا، بوستاندىق اۋدانى – MEGA Almaty – روزىباكييەۆا، جەتىسۋ اۋدانى – «گۇلدەر» ساياباعى، مەدەۋ اۋدانى – عىلىم ورداسى عيماراتىنىڭ الدىنداعى الاڭ، ناۋرىزباي – اۋدان اكىمدىگى عيماراتىنىڭ الدىندا، تۇركسىب – ساۋرانبايەۆ كوشەسىندەگى ارباتتا).
ءانۇراندى ورىنداعاننان كەيىن جوو، كوللەدج جانە اسكەري وقۋ ورىندارى ستۋدەنتتەرىنىڭ قاتىسۋىمەن «قىران ەلىم – قازاقستان» فلەشموبى وتەدى.
25 قازان كۇنى ساعات 10:00-دە «ۇلتتىق دالا ويىندارى» رەسپۋبليكالىق ۇلتتىق سپورت تۇرلەرىنىڭ فەستيۆالى وتەدى. وتەتىن ورنى – وماروۆ كوشەسى، 10ا مەكەنجايداعى الماتى يپپودرومى.
25 قازان كۇنى ساعات 17:00-دە قازاقستاندىق ەسترادا جۇلدىزدارىنىڭ قاتىسۋىمەن «استانا» الاڭىندا مەرەكەلىك كونسەرت وتەدى.
كونسەرتتەن كەيىن مەرەكەلىك ساليۋت بولادى.