الماتىدا 17 كونفەسسيا بار، سونداي-اق، رەسمي تىركەلگەن 190 ءدىني بىرلەستىك جۇمىس ىستەيدى.
بۇل تۋرالى الماتى قالاسى ءدىن ىستەرى جونىندەگى باسقارماسى جاۋاپ بەردى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
ۆەدومستۆونىڭ مالىمەتىنشە، الماتى — ميلليونداعان حالقى بار ۇلكەن مەگاپوليس. تيىسىنشە، ادامدار نەعۇرلىم كوپ بولسا، سوعۇرلىم ولار ءارتۇرلى ءدىندى ۇستانادى.
ەگەر رەسپۋبليكادا 18 ءتۇرلى كونفەسسيا تىركەلگەن بولسا، الماتىدا 17 كونفەسسيا بار. 190 رەسمي تىركەلگەن ءدىني بىرلەستىك جۇمىس ىستەيدى. اتالعان ءدىني بىرلەستىكتەردىڭ قىزمەتى زاڭمەن رەتتەلەدى. ەگەر دە قانداي دا ءبىر قۇقىق بۇزۋشىلىقتار بولعان جاعدايدا سايكەسىنشە شارالار قابىلدانادى.
رەسمي تىركەلگەن ءدىني بىرلەستىكتەردەن بولەك، قوعامدا دەسترۋكتيۆتى سيپاتتاعى ءدىني اعىمدار دا بار. بۇل ءدىني اعىمداردىڭ باستى ەرەكشەلىگى ەشبىر رەسمي تىركەۋدەن وتپەگەن جانە قوعامدا ءداستۇرلى قۇندىلىقتاردى جوققا شىعارا وتىرىپ، ونى مويىندامايدى. وسىعان وراي، الماتى قالاسى ءدىن ىستەرى جونىندەگى باسقارماسى تاراپىنان مەملەكەتتىڭ ءدىن سالاسىنداعى ساياساتىن جۇزەگە اسىرۋشى جەرگىلىكتى اتقارۋشى ورگان رەتىندە الدىن الۋ بويىنشا كەشەندى جۇمىستار جۇرگىزىلۋدە.
قازاقستان رەسپۋبليكاسى كونستيتۋسياسىنىڭ 19-بابىنا سايكەس، اركىم ءوزىنىڭ قاي ۇلتقا، قاي پارتياعا جانە قاي دىنگە جاتاتىنىن ءوزى انىقتاۋعا جانە ونى كورسەتۋ-كورسەتپەۋگە حاقىلى. وسىعان وراي، باسقارما تاراپىنان ءدىندى ۇستاناتىن نەمەسە ۇستانبايتىن ازاماتتاردىڭ ەسەبى جۇرگىزىلمەيدى.
الماتى قالاسى ءدىن ىستەرى جونىندەگى باسقارما، سونداي-اق، جات اعىمنىڭ سوڭىنان ەرىپ، وپىق جەگەن قالا تۇرعىنى تۋرالى مىسال كەلتىردى.
«راديكالدى سيپاتتاعى ءدىني اعىمنىڭ جەتەگىنە ەرىپ، سيرياعا اتتانعان وتانداستارىمىز 2019 جىلى «جۋسان» وپەراسياسى كومەگىمەن قازاقستانعا ورالدى. كەيبىرى جۇبايلارىنان ايىرىلىپ، ەندى ءبىرى بالالارىن جەر قوينىنا تاپسىرىپ قايتتى. ولاردىڭ قاتارىندا الماتىلىق گاۋحار (ەسىمى وزگەرتىلگەن) بار. گاۋحار سيرياعا كۇيەۋىنىڭ ۇگىتتەۋىمەن بارعان. كوپ بالالى انا جۇبايىمەن اجىراسقان سوڭ باسقا ۇلتتىڭ ازاماتىمەن تانىسىپ، ەكىنشى رەت وتاۋ قۇرعان.
باستاپقىدا ءيمانجۇزدى بولىپ كورىنىپ، قولداۋ كورسەتكەن. كەيىن ءداستۇرلى نامازعا تىيىم سالعان. راديكالدى سيپاتتاعى ءدىني اعىمدى ۇستاناتىنىن سول كەزدە تۇسىنگەن. 2016 جىلى تمد ەلى ارقىلى تۇركياعا ۇشىپ، كۇيەۋى كەيىن وقۋ-جاتتىعۋعا كەتىپ، قايتا ورالماعان. سيريادا ناماز وقىماعاندىقتان گاۋحار قۋدالاۋعا ۇشىراعان. ءارى جەرگىلىكتى تارتىپكە باعىنباعاندىقتان ونى «تىڭشى» دەپ اتاعان.
كەيىپكەردىڭ سوزىنشە ول جاقتا ناماز وقىماعانداردى «كاپىرلەر» دەيدى. ءتۇرلى جامان سوزدەردى ايتادى. ءبىرىن-بىرى ۇرادى، ولتىرۋدەن دە قايمىقپايدى. ول سول جاقتا ءجۇرىپ، قازاقستانعا جەتەتىن بەيبىت ەلدىڭ جوق ەكەنىن تۇسىنگەن»، - دەپ حابارلادى الماتى قالاسىنىڭ ءدىن ىستەرى جونىندەگى باسقارماسى.