باستى ماقسات – رەفەرەندۋمدى قولداۋ ءۇشىن قوعامدىق پىكىر قالىپتاستىرۋ
رەفەرەندۋمدى قوعامدىق قولداۋ جونىندەگى قالالىق شتابتىڭ قۇرامىنا ءىرى ۇيىمداردىڭ 23 وكىلى، عالىمدار، بلوگەرلەر مەن جۋرناليستەر، جاستار مەن ارداگەرلەر قاۋىمى ەندى. بۇل تۋرالى Almaty-akshamy.kz حابارلايدى.
شتاب مۇشەلەرى ەڭبەك ۇجىمدارىنا، كاسىپورىندارعا بارىپ، ءتۇسىندىرۋ جۇمىستارىن جۇرگىزەدى، قالا اۋداندارىن ارالايدى. بۇل تۋرالى باسپا ءسوز ءماسليحاتىندا شتاب باسشىسى قازاقستان رەسپۋبليكاسى جوعارى وقۋ ورىندارى قاۋىمداستىعىنىڭ باسشىسى راحمان الشانوۆ ءمالىم ەتتى.
– ءبىزدىڭ ماقساتىمىز – جالپىحالىقتىق رەفەرەندۋمدى قولداۋ ءۇشىن قوعامدىق پىكىر قالىپتاستىرۋ. الماتى ءارقاشان ءىرى ساياسي وقيعالاردىڭ وشاعى بولىپ تابىلادى. قالامىز وتە بەلسەندى. بۇگىن ءبىز قوعامدىق بىرلەستىكتەردىڭ وكىلدەرىمەن جينالىپ، رەفەرەندۋمدى قولدايتىن قالالىق شتاب قۇرۋدى ۇسىنىپ وتىرمىز، – دەدى ق ر جوعارى وقۋ ورىندارى قاۋىمداستىعىنىڭ باسشىسى راحمان الشانوۆ.
مەملەكەت باسشىسىنىڭ كونستيتۋسياعا وزگەرتۋلەر مەن تولىقتىرۋلار ەنگىزۋ تۋرالى ۇسىنىسىن الماتى قالاسى قحا عىلىمي-ساراپشىلىق توبى ءتوراعاسىنىڭ ورىنباسارى سۆەتلانا انانيەۆا دا قولدادى. ونىڭ پىكىرىنشە، پرەزيدەنت قازاقستان حالقىنىڭ بىرلىگىنە ۇلكەن ءمان بەرەدى.
– اسسامبلەيا قازاقستان حالقىنىڭ مۇددەسىنە قىزمەت ەتەدى. ەڭ باستىسى دا وسى. 5 ماۋسىمعا بەلگىلەنگەن رەفەرەندۋم قازاقستان دامۋىنىڭ اسا ماڭىزدى باعىتتارى تۋرالى قازاق قوعامىنىڭ پىكىرىن بىلدىرۋگە باعىتتالعان. ءبىز كوپۇلتتى مەملەكەتپىز. ءبىز ونى ماقتان تۇتامىز. ەندەشە، پرەزيدەنتىمىز اتاپ كورسەتكەندەي، ءبىز ەتنوستارىمىزدىڭ مادەنيەتىنىڭ الۋان تۇرلىلىگىن ساقتاۋىمىز كەرەك، – دەدى سپيكەر.
ەستەرىڭىزگە سالا كەتەيىك، رەفەرەندۋمنىڭ ءوز دەڭگەيىندە وتۋىنە وعان قاتىسۋ ءۇشىن تىزىمگە ەنگىزىلگەن قازاقستاندىقتاردىڭ جارتىسىنان كوبى داۋىس بەرۋى كەرەك. داۋىس بەرۋگە ءبىر عانا سۇراق قويىلادى. ەكى ىقتيمال جاۋاپ بولادى: «جاقتايمىن» نەمەسە «قارسىمىن».
رەفەرەندۋمدى قوعامدىق قولداۋ شتابى مۇشەلەرىنىڭ پىكىرىنشە، كونستيتۋسياعا ەنگىزىلگەن وزگەرىستەر ۇكىمەت حالقىنا ەسەپ بەرەتىن ىقپالدى پارلامەنتتىڭ، ناعىز حالىقتىق ءماسليحاتتاردىڭ جۇمىس ىستەۋىنىڭ ءتيىمدى تەتىكتەرىن قامتاماسىز ەتەدى. ولار ۇسىنىلىپ وتىرعان كونستيتۋسيالىق رەفورما ەرەجەلەرى قابىلدانسا ساياسي پليۋراليزم مەن باسەكەگە قابىلەتتى دەموكراتيالىق ورتانىڭ دامۋى ءۇشىن بارلىق قاجەتتى جاعدايلار جاسالاتىنىنا بەك سەنىمدى.
قوعامدىق شتاب مۇشەلەرى بارشا قازاقستاندىقتاردى ورتاق ماقسات جولىنداعى بۇل جالپىحالىقتىق شاراعا ىنتا-جىگەرمەن، بەلسەندى ازاماتتىق جاۋاپكەرشىلىكپەن جۇمىلىپ، رەسپۋبليكالىق رەفەرەندۋمدا داۋىس بەرۋگە قاتىسۋعا شاقىرادى.