بۇگىن قازاقستاندا اەس قۇرىلىسى ماسەلەسى بويىنشا رەسپۋبليكالىق رەفەرەندۋم ءجۇرىپ جاتىر. الماتىدا بارلىق 624 سايلاۋ ۋچاسكەسى اشىلدى. م. تىنىشپايەۆ اتىنداعى قازاق كولىك جانە كوممۋنيكاسيالار كوللەدجىندە ورنالاسقان №84 سايلاۋ ۋچاسكەسى تاڭعى 07:00-دە ەسىگىن ايقارا اشتى.
ۋچاسكەدە سايلاۋ بيۋللەتەندەرىن بەرۋ ورنى، قۇپيا داۋىس بەرۋگە ارنالعان كابينالار جانە ستاسيونارلىق ءمولدىر جاشىك ورناتىلعان.
سايلاۋ ۋچاسكەسى اشىلعانعا دەيىن-اق ازاماتتىق پارىزىن وتەۋگە كەلگەندەردىڭ قاراسى كوپ بولدى. قالىپتاسقان ءداستۇر بويىنشا ۋچاسكەدە العاشقى سايلاۋشىلارعا سيمۆوليكالىق سىيلىقتار بەرىلدى.
«بۇگىن العاشقى بولىپ داۋىس بەرگەندەرگە ءتاتتى سىيلىقتار بەرىلدى. سونداي-اق، العاش رەت رەفەرەندۋمعا كەلگەندەردى دە ماراپاتتادىق. جالپى، اتموسفەرا سالتاناتتى، سايلاۋ ۇدەرىسىنىڭ ىڭعايلىلىعى ءۇشىن بارلىق جاعداي جاسالعان»، – دەدى №84 ۋچاسكەلىك سايلاۋ كوميسسياسىنىڭ ءتوراعاسى عالىمجان اشىربايەۆ.
ونىڭ ايتۋىنشا، بۇل ۋچاسكەدە 1469 ادام تىركەلگەن، ونىڭ ىشىندە 217 ادام العاش رەت داۋىس بەرسە، الماتىلىق قازىبەك ءالىحانوۆ ءۇشىن رەفەرەندۋم كۇنى تۋعان كۇنىمەن سايكەس كەلدى. سونداي-اق ۋچاسكەدە 279 زەينەتكەر جانە ەرەكشە قاجەتتىلىگى بار 9 ادام تىركەلگەن، ولارعا ارنايى كابينالار قاراستىرىلعان. ەستۋ قابىلەتى ناشار تۇرعىندار قۇلاققاپپەن جابدىقتالعان كومپيۋتەردى پايدالانا الادى. كورۋ قابىلەتى ناشار ادامدار ءۇشىن برايل قارپىمەن جازىلعان ارنايى بيۋللەتەندەر، قوسىمشا جارىق جانە لۋپالار بار. سونىمەن قاتار، ونلاين رەجيمدە سۋردواۋدارماشىلار كەزەكپەن جۇمىس ىستەيدى.
«مەنىڭ ويىمشا، رەفەرەندۋمعا قاتىسۋ – ءاربىر ازاماتتىڭ بورىشى. اەس سالۋ ماسەلەسى وتە ماڭىزدى. ينتەرنەتتەن جاڭالىقتار مەن پىكىرلەردى وقۋ ءبىر بولەك، ال تاڭداۋ جاساپ، ءوز داۋىسىڭدى بەرۋ مۇلدە باسقا»، – دەپ الماتىلىق ماكسيم گورباچيەۆ ويىن ايتتى.
ەڭ بەلسەندى قالا تۇرعىندارى تاڭداۋىن جاساپ ۇلگەردى.
«مەملەكەتتىڭ دامۋىنا ۇلەس قوسۋعا بىزدە بىرەگەي مۇمكىندىك بار. ونى پايدالانۋىمىز كەرەك!»، – دەدى سايلاۋشى دانيار ىسقاقوۆ.
ايتا كەتۋ كەرەك، ەگەر سايلاۋشىلار بەلگىلى سەبەپپەن ۋچاسكەگە كەلە الماسا، كوميسسيا مۇشەلەرى جىلجىمالى جاشىكپەن ۇيلەرىنە بارادى.
ەسكە سالا كەتەيىك، بۇگىن قازاقستان اۋماعىندا اتوم ەلەكتر ستانسياسىن سالۋ ماسەلەسى بويىنشا رەسپۋبليكالىق رەفەرەندۋم ءوتىپ جاتىر. الماتى اكىمى ەربولات دوسايەۆ جۇبايىمەن بىرگە تاڭەرتەڭ №388 مەكتەپ-ليسەيىندە ورنالاسقان سايلاۋ ۋچاسكەسىنە كەلىپ، داۋىس بەردى. قالاداعى سايلاۋ ۋچاسكەلەرى ساعات 20:00-گە دەيىن جۇمىس ىستەيدى.