اعىمداعى جىلدىڭ ناۋرىز ايىنان باستاپ سىرقاتتانۋشىلىقتىڭ تومەندەۋ ءۇردىسى بايقالادى. سونىمەن قاتار، ۆاكسيناسيالانباعان بالالار مەن ۆاكسيناسيا مارتەبەسى بەلگىسىز ەرەسەكتەر اراسىندا قىزىلشانى تىركەۋ جالعاسۋدا.
مۇنداي دەرەكتەردى الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى كەلتىردى، دەپ حابارلايدى akshamnews.kz
الماتى قالاسىندا اعىمداعى جىلدىڭ باسىنان باستاپ 24 شىلدەنى قوسا العاندا قىزىلشانىڭ 3289 راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 2034 جاعداي (61،8%)، 15 جاستان 18 جاسقا دەيىنگى جاسوسپىرىمدەر اراسىندا – 168 (5،1%) جانە ەرەسەكتەر اراسىندا – 1087 (33%).
بالالار اراسىنداعى اۋرۋشاڭدىعى نەگىزىنەن ۆاكسيناسيادان باس تارتۋ سەبەبىنەن بولىپ تابىلادى، سونداي-اق ۆاكسيناسيادان مەديسينالىق بوساتۋ جانە ەگۋ جاسىنا جەتپەۋ سالدارىنان تىركەلەدى.
قىزىلشا – بۇل اۋا-تامشىلى ينفەكسيالار توبىنا جاتاتىن قۇرامىندا رنق ۆيرۋسى بار جەدەل رەسپيراتورلىق جوعارى جۇقپالى ۆيرۋستىق اۋرۋ.
اۋرۋ ناۋقاس ادامنان ساۋ ادامعا اۋا ارقىلى، تىنىس الۋ جولدارىنان تامشىلارمەن نەمەسە جۇقتىرعان ادامداردىڭ مۇرنىنان نەمەسە تاماعىنان سەكرەسيالارمەن تىكەلەي بايلانىستا بولعاندا جۇعادى.
قىزىلشانى جۇقتىرعان ادام ينكۋباسيالىق كەزەڭ اياقتالعانعا دەيىن 2 كۇن بۇرىن (ياعني العاشقى كلينيكالىق بەلگىلەر پايدا بولعانعا دەيىن) باسقالارعا جۇقپالى بولادى جانە بورتپە پايدا بولعاننان كەيىن 5 كۇن ىشىندە (پنيەۆمونيا بولعان جاعدايدا 10 كۇنگە دەيىن) باسقالارعا جۇقپالى بولىپ قالادى.
قىزىلشا – ادامدار ءۇشىن اسا كونتاگيوزدى جۇقپالاردىڭ ءبىرى، ويتكەنى ينفەكسيا كوزىمەن جاقىن قارىم-قاتىناستا بولعاننان كەيىن قىزىلشاعا قارسى ۆاكسيناسيالانباعان ادامداردىڭ 90%-دان استامى اۋىرادى.
قىزىلشانى جۇقتىرۋدى، سونداي-اق ونىڭ اسقىنۋىن بولدىرمايتىن جالعىز ءتيىمدى قۇرال تەك ۆاكسيناسيا بولىپ تابىلادى. قىزىلشاعا قارسى جوسپارلى ۆاكسيناسيا 2 رەت، ءبىرىنشىسى – 1 جاستا (12-15 اي)، ەكىنشىسى – 6 جاستا جۇرگىزىلەدى، بۇل ۆاكسيناسيادان كەيىنگى يممۋنيتەتتى دامىتۋعا مۇمكىندىك بەرەدى.
2023 جىلعى 10 قاراشا مەن 2024 جىلعى 24 شىلدەنىڭ ارالىعىندا قالادا قىزىلشا، قىزامىق، پاروتيتكە قارسى قوسىمشا جاپپاي يممۋنداۋ شەڭبەرىندە بارلىعى 162 986 ادام قامتىلدى، ونىڭ ىشىندە 6 ايدان باستاپ 10 اي 29 كۇنگە دەيىنگى 13 214 بالا، 2 جاستان 4 جاسقا دەيىنگى بالالار – 80 042، مەديسينا قىزمەتكەرلەرى – 8676 جانە باسقا جاستاعى بۇرىن قىزىلشاعا قارسى جوسپارلى ەكپە الماعان (ۆاكسيناسيا كۋرسى تولىق ەمەس) تولىقتىرا يممۋنداۋ بويىنشا 61 054 بالا.
سونىمەن قاتار، ۇلتتىق پروفيلاكتيكالىق ەگۋ كۇنتىزبەسىنە سايكەسنىسانالى توپتاعى بالالارىنا قىزىلشاعا قارسى جوسپارلى يممۋنداۋ جالعاسۋدا: 1 جاستا (12-15 اي) ۆاكسيناسيا جانە 6 جاستا ريەۆاكسيناسيا.
بۇدان باسقا، بۇرىن قىزىلشاعا قارسى ەگىلمەگەن باسقا جاستاعى (18 جاسقا دەيىنگى) بالالار اۋماقتىق ەمحانادا قۋىپ جەتەتىن يممۋنداۋ بويىنشا ەكپە الا الادى.
قازىرگى ۋاقىتتا قالادا ققپ ۆاكسيناسى جەتكىلىكتى مولشەردە بار.
ەكپەلەردى جۇرگىزۋ ءۇشىن ددۇ سەرتيفيكاتتاعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، پاروتيتكە قارسى ارالاس ۆاكسينا قولدانىلادى. ۆاكسيناسيا تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى.
وڭتۇستىك مەگاپوليستىڭ ەپيدەميولوگتارى قىزىلشانى جۇقپالى جانە قىزىلشا ينفەكسياسىنان كەيىنگى ىقتيمال اسقىنۋلارىمەن ءقاۋىپتى ەكەنىن ەسكە سالادى. اۋرۋدىڭ اۋىر اعىمىندا اسقىنۋلار داميدى، مىسالى، ورتاڭعى قۇلاقتىڭ، وكپەنىڭ، تراحەيانىڭ، برونحتىڭ قابىنۋى، سونداي-اق ميدىڭ قابىنۋى. كوبىنەسە اسقىنۋلار بەس جاسقا دەيىنگى بالالاردا نەمەسە 30 جاستان اسقان ەرەسەكتەردە داميدى. ەڭ اۋىر اسقىنۋلارعا سوقىرلىق، ەنسەفاليت (ميدىڭ ىسىنۋىنە اكەلەتىن ينفەكسيا)، اۋىر ديارەيا جانە ونىمەن بايلانىستى دەگيدراتاسيا، قۇلاق ينفەكسياسى (وتيت) جانە پنيەۆمونيا سياقتى اۋىر تىنىس جولدارىنىڭ ينفەكسيالارى جاتادى.
اۋرۋدىڭ بەلگىلەرى پايدا بولعان كەزدە كەلەسى قاعيدالاردى قاتاڭ تۇردە ۇسىنىلادى:
- ءوزىن-وزى ەمدەۋمەن اينالىسپاۋ، دارىگەردى ۇيگە شاقىرىپ جانە دارىگەردىڭ نۇسقاۋى بويىنشا ەم الۋ؛
- ۇيدە بولۋ، جۇمىس جانە وقۋ ورىندارىنا، سونداي-اق قوعامدىق جانە مادەني-بۇقارالىق ءىس-شارالار ورىندارىنا بارماۋ. اسىرەسە، امبۋلاتوريالىق ەمدەلىپ جاتقان ناۋقاستار ۇيدە وقشاۋلاۋدى قاتاڭ ساقتاۋى كەرەك؛
- اۋىرعان بالالاردى ۇيىمداسقان ۇجىمدارعا، مەكتەپتەرگە، مدبۇ-عا، ت.ب جىبەرمەۋ.
قىزىلشاعا قارسى ۆاكسيناسيا – قىزىلشانى جۇقتىرۋدى، سونداي-اق ونىڭ اسقىنۋىن بولدىرمايتىن جالعىز ءتيىمدى قۇرال.
قىزىلشاعا قارسى ۆاكسينانىڭ ءاربىر الىنعان دوزاسى بالانىڭ يممۋنيتەتىن كۇشەيتەدى!